Allen^a) den, die disen brief an sehent lesent oder ho^erent lesen, tůn ich Johans von Brunberg¹ ietz sesshaft ze Vrowenuelt² kunt vnd vergih des offenlich mit || disem brief, das ich mit gůter wissentlicher vorbetrahtung vnd beschaidenhait von miner redlichen not vnd sach wegen verkoft han die erbern lut Johansen || vnd Cůnrat die Dietzin von Bútzziswille³ gebrůder vnd Elsbethun ir elichen swo^ester Hainrichs Kurzimans von Búzziswille elichi frôw ellú drú mit lib || vnd mit gůt vnd mit allen rehten, die min lehen warent von der wolerbornen miner gna^edigen herschaft von Toggenburg, vnd han ze koffenne geben redlich vnd reht fúr mich vnd fúr alle min erben vnd nâhkômen ains rehten besta^eten redlichen vnd vngeuarlichen kofs vnd in ewiges kofs wise den wolerbornen minen gna^edigen herren graf Tonat vnd graf Diethelmen von Toggenburg⁴ gebrůdern vnd iren erben, ob sú enwa^erint, vmb fúnf pfunt pfenning alles gůter vnd gena^emer Costentzer múns, der selben pfenning ich aller gar vnd gentzlich von in bin gewert vnd bezalt an den stetten, da ichs in minen offenn vnd schinbaren gůten nûtz geben vnd bewendet han. Ich han och mit gesundem libe vnd mit wolbedâhtem můt den vorgenanten minen herren von Toggenburg die vorgenanten Johans vnd Cůnrat die Dietzin vnd Elsbethun ir swo^ester ellú drú mit lib vnd mit gůt vnd mit allen rehten an ir hand letklich vnd frilich vfgeben geuertegot vnd zů iro vnd ir erben handen brâht, als reht sitt vnd gewônlich was. Vnd won och ich den selben koffe also vngeuârlich mit gůtem willen vnbetwungenlich gen in getan vnd volfu^ert han, so han ich mich in der vorgenanten miner herren von Toggenburg vnd in ir erben hand fúr mich vnd fúr alle min erben letklich vnd frilichen entzigen an den vorgenanten lúten an ir lib vnd an ir gůt mit allen rehten vnd entzihe och mit vrkund dis briefs gentzlich vnd gar aller aigenschaft aller lehenschaft aller kuntschaft aller besatzzung aller zúgnust aller gewer lút vnd brieue aller vordrung vnd ansprach vnd och alles rehtes gaistlichs vnd weltlichs gerichtes, da mit ich oder min erben vnd nahkomen oder ieman andrer von v´nsren wegen vnd an v´nser statt die selben lút ir lib ald ir gůt mit allen rehten nv ald hernach kúndint ald mo^ehtint angesprechen ald da mit wir den selben koffe wider ru^effen wider bringen ald ze niht machen in dehain wis mo^ehtint, ân alle geuerd. Ich sol vnd geloben och mit disem brief fúr mich vnd fúr alle min erben vnd nähkomen, die ich vesteklich herzů binde in dirr sach, der vorgenanten miner herschaft graf Tonatz vnd graf Diethelms von Toggenburg vnd ir erben der vorgenanten Johans vnd Cůnrat Dietzis vnd Elsbethun ir swo^ester mit allen rehten reht wer ze sinne gen mainglichem vff gaistlichem vnd vff weltlichem gericht vnd och an allen andren stetten, wenn wa vnd wie dik sin die selben von Toggenburg vnd ir erben vnd och die selben lút des bedurfent vnd notdúrftig sint ald darumb angesprochen oder vfgetriben werdent, das ich vnd min erben sú darumb nach dem rehten verstan versprechen vnd von der ansprach entrihen vnd ledig machen sont ân fúrzug vnd gentzlich ân im schaden ân geuerd. Vnd ist dis alles redlich vnd reht beschehen volfu^ert vnd volbraht mit allen worten werken geba^erden vnd geta^eten vnd mit aller ordnung, so darzů gehôrte vnd geho^eren mohte von gewônhait vnd von rehte vnd als es kraft vnd maht vnd och hantfesti hat vnd haben sol vnd mag nv^ vnd hernach, ân geuerd. Vnd des vnd hierúber ze ainer sta^eten sicherren ewigen warhait aller vorgeschribener ding vnd gedingde han ich Johans von Brunberg da vorgenant min insigel fúr mich vnd fúr alle min erben offenlich gehenkt an disen brief. Der geben ist ze Wil⁵ in der statt an der na^ehsten mitwochen nach mittem ma^eyen, do man zalt von gottes gebúrt drúzehenhundert jar, sibentzig jar, darnach in dem ahtoden jar.

Source Fulltext: Chartularium Sangallense IX, Nr. 5645, S. 322-323.