Wir dez hailigen Ro^emischen richs stett Vlme, Costentz, Esselingen¹, Rútlingen², Rotwile³, Wile⁴, V´berlingen⁵, Memmingen⁶, Bybrach⁷, Rauenspurg⁸, Lindowe⁹, sant Gallen, Kemptun¹⁰, Koufbúren¹¹, Liukirch¹², Ysni¹³, Wangen¹⁴, Bůchorn¹⁵, No^erdlingen¹⁶, Dinkelspúhel¹⁷, Boppfingen¹⁸, Aulun¹⁹, Gemúnde²⁰, Halle²¹, Hailprunnen²², Winpfen²³, Winsperg²⁴ vnd Bůchowe²⁵ bekennen || v^ens mit disem brieff vnd tu^en kunt allen den, die in an sehent lesent oder ho^erent lesen, wie doch daz wir von wegen dez hailigen richs sunderlich darzů geordnet vnd gewidemt sien, daz wir alle redlich vnd gerecht sache fúr v^ens nemen vnd setzen súllen, daz haben wir betrachtet vnd angesehen vnd haben ouch denne gedacht, daz weder frid noch gemach mit || kainen andern sachen alz nutzlich alz trostlich noch alz wol gemachet noch daz daz land alz wol geschirmt vnd befridet werden mag alz mit dem, daz wir ainhellig sien vnd v^ens vnder ain ander verbinden, dauon vnd von so^eliches kúnftiges nutzes wegen, der daruzz wachsen vnd gan mag, haben wir v´ns ze samen verstriket gesworn vnd gebunden vnd haben daz doch || in kainer andern wise denn durch luter gůt daz recht ze schirment vnrechten gewalt wider stând vnd frid ze machent erdacht vnd getân, alz ouch sich daz aigenlichen wol erfindet in dem, daz wir dem hailigen riche alliv siniv recht mit namen in den selben v´nsern búnden haben vzgesetzt ze haltend ze tůnd a^vn alle geuerd. Wan aber wir wol verstanden vnd ouch sich mit rechter warhait erfindet, daz wir a^vn die fu^ersten vnd herren von O^esterich in v´nsern landen vnd kraissen Intern frid vnd sichern schirm vnd wandel nymmer zů bringen geschaffen noch gemachen múgen von dez wegen, wan iriv land schlozz vnd lút vnder v^ens vermischet vnd neben vnd bi vnsern stetten gelegen sint, je doch wan denne die durchlúchtigen fursten vnd herren herzog Albrecht vnd herzog Liuppolt gebru^eder von gottez genaden herzogen ze O^esterich ze Styr ze Kernden vnd ze Krain grafen ze Tyrol²⁶ v´nser lieben gena^edigen herren so gar mit gantzer begird daruf genaiget vnd mit sta^eten flizzen teglichs darnach betrachtend, wie daz si zů friden vnd da mit daz land witwen vnd waisen arm vnd riche lantfarer bilgrin koufflút vnd koufmanschatz geschirmt werden sicher sien vnd bi gemach beliben helffen sweren vnd raten, darumb so haben wir v^ens wolberatenlichen vnd mit gůten fúrsa^etzen nach rat v´nser gůten frúnd got ze lob dem hailigen riche ze sterkung ze nutz vnd ouch ze ewer vnd v^ens vnd gemainem land ze schirme zu frid vnd ze gemache ietzo tugentlichen vnd williclichen zů den vorgenanten vnsern herren den fúrsten vnd herzogen von O^esterich vnd zů iren landen Elsez²⁷, Brisgo^ewe²⁸, Sunggo^ewe²⁹, Ergo^ewe³⁰, Turgo^ew^e31, Kurwalhen³² vnd Swaben³³ vnd mit namen zů allen den stetten vestinan vnd schlozzen vnd waz denselben landen zůgeho^ert vnd ouch zů allen iren lantvo^egten dyenern herren rittern vnd knechten, die in den selben landen vnd kraissen gelegen gesezzen vnd wůnend sint, mit v^ens selb vnd mit allen v´nsern stetten vestinan vnd schlozzen ietzo tugentlich vnd williclichen verstrikt verpflicht vnd verbunden verstriken vnd verbinden v^ens ouch ietzo mit rechter wissend vnd krafft ditz brieffs hinnan von hiut dem tag, alz dirr brief geben ist, biz vff sant Go^eryen tag, der nechst kumt, vnd dannan hin vier gantziv jar div nechsten nach ainander ze zellend mit gůten trúwen vnd geswornen aiden, die wir alle liplich ze got vnd ze den hailigen darumb mit vffgebotten vingern vnd gelerten worten gelobt vnd gesworn haben, allez daz getrúwelich war ze lassen stet ze halten ze laisten vnd ouch ze vollfu^eren a^vn alle arglist vnd geuerd, daz zwischan v^ens gerett vnd verteidinget worden ist vnd alz hie nach von wort ze wort begriffen vnd verschriben stat. Bi dem ersten so haben wir den obgenanten vnsern herren vnd fu^ersten von O^esterich gelobt versprochen vnd verhaissen, ob daz wa^er, daz yemen, wer der wa^er, die selben v´nser herren von O^esterich oder ir lantvo^egt stett ald dehain ire diener, ez weren herren ritter oder knecht, die in den vorgenanten landen vnd kraissen gesezzen vnd gelegen sint oder die zů den selben landen geho^erent, ir ainen oder mer gemainlich oder besunder von iren rechten frihaiten genaden briefen oder gůten gewonhaiten dringen beschadigen oder bekrenken wo^elte, die si von Ro^emischen kaysern vnd ku^enigen hant vnd v^entz her bracht hant, oder ez wa^er an iren gůten landen oder lúten roůplich oder wider rechtz, daz wir den selben v^ensern herren von O^esterich vnd iren lantvo^egten stetten vnd dyenern, welch denn also beschadget vnd angriffen worden sint, wenn vnd alz bald wir daz verho^eren innan oder gewar werden ald von in ermant werden, darynne ze frischer getat getrúwelich vnd a^vn alle geuerd sullen vnd wollen beraten vnd beholffen sin, alz verre wir vermúgen, alz ob ez v´nser selbz sach we^ar vnd v^ens selb widerfaren vnd beschehen wer. Wa^er aber, daz so^elich angriff oder beschedigungen also gestalt oder geschaffen weren, daz si ze frischer getat nit erobert noch vsgetragen so^elten oder mo^echten werden oder daz die vorgenanten v´nser herren von O^esterich oder ir lantvo^egt oder stett ald dehain ir diener in den obgenanten iren landen vnd kraissen ir ain oder me v´nser hilff suz bedo^erften vnd von ander sach wegen han mu^esten, wenn v^ens denn die selben, die also beschediget sint oder die v´nser hilffe suz hân wo^eltend, darumb ermanent vnd vmb hilff zů sprechent, so sullen wir in darzů aber getrúwelichen raten vnd beholffen sin in der wise, daz wir in hundert erber mit spiezsen ze rozz zů schiken senden vnd lihen súllen vnd mit den ouch sy die selben sach erobern vnd vstragen súllen, alz verre sy vermúgend, a^vn alle geuerd, vnd súllen ouch ordnen vnd fu^egen, daz der selben spiezz fúnfzig in den nechsten acht tagen nach ir manunge von hus vzz geschikt werden vnd riten vnd die v´brigen fúnfzig spiezz in den nechsten acht tagen darnach, also daz mit namen die spiezz alle hundert in den nechsten vierzehen tagen nach der ersten manung vnuerzogenl(ichen) vnd gentzlichen vnd gar vzgeschikt vnd von hus vz geritten sien, a^vn alle geuerd, vnd in welher gebiete div selb sache also beschehen ist ald erobert oder vzzgetragen werden sol, da súllen si der stat vnder v´ns, div der selben riuier aller nechst gelegen ist, verkúnden vnd darumb ermanen, vnd div sol denn den andern v´nsern stetten verkúnden vnd enbieten vnd ouch schaffen vnd vstragen, daz die spiezz also gesent vnd geuertiget werden, alz vorgeschriben stat, bi den gelúbden vnd aiden, die wir darumb gelobt vnd gesworn haben, a^vn alle geuerd, vnd wenn oder alz bald die hundert mit spiezzen in der vorgenanten vnser herren von O^esterich oder ir lantvo^egt oder stett ald dehain ir diener, ez weren herren ritter oder knecht, vestinan schlozz oder stett komend, so súllent si in die selben rais vnd ouch dienst vz vnd vzz, wa oder wie lang sy in iren stetten vestinan oder schlozzen ligend, holtz ho^ewe strow liecht vnd behusung zů schaffen fu^egen vnd geben a^vn v´nsern schaden. Wa^er aber, daz die vorgenanten vnser herren von O^esterich oder ir lantvo^egt ald dehain ir stett oder diener in den vorgenanten kraissen oder gebieten beschadget wúrden vnd daz die selben angriffe vnd beschedigung alz gar grozz vnd mechtig weren vnd mit so^elichem gewalt zů gingen, daz si daz mit den hundert spiezzen a^vn ander vnser zů tůn vnd hilff nit erobern noch vsstragen mo^echten a^vn alle geuerd vnd daz sich die obgenanten v´nser herren von O^esterich, ob si in land werend, von der selben beschedigung mit iren ra^eten vf ir fúrstlich trúwe vnd ere erkanten vnd mit dem merren tail ze rat würden, daz si v´nser hilff fúrbaz vnd v´ber die hundert spiezz bedo^erften vnd notdúrftig weren, daz súllen si denn bringen an welhi stat v´nsers bundz si wend vnd die in denne zů den sachen aller best gelegen ist, vnd dunkt denne die selben statt vnder v^ens, daz div sach also gestalt vnd geschaffen wer, daz si gemains bundz darzů nit bedo^erfte, so sol sy dry stett die nechsten vnder v^ens bi in darumb vnuerzogenlichen zů in beschiken vnd eruordern vnd die ouch dahin a^vn alle widerrede komen súllen, vnd dunkt denne die vier stett vf ir aid, daz div sache also gestalt sy, daz si die ding wol erobern vnd vztragen múgen, so súllen si darúber sitzen vnd sich bi eren vnd aiden erkennen vnd ouch hilffe scho^epfen vnd ouch darzů mit gantzer ir macht zů ziehen vnd in dez beholfen sin nach dem, alz denne die obgenanten fúrsten vnd herren die sache an si geworben vnd bracht hânt vnd alz ouch si sich nach iren eren erkennent, daz si darzů notdúrftig sint nach dem, alz denn div sache an ir selb gestalt vnd geschaffen ist, getriuwelich vnd a^vn alle arg list vnd geuerd. Wa^er aber, daz die selben vier stette die sach alz heftig vnd alz mechtig dúchte, daz si die sach ainig vnd a^vn gantzen v´nsern bund nit erobern noch sich darumb erkennen oder hilf schepfen sullen oder múgen, die súllen denn die sache bringen an gantzen v´nsern bund vnd die stett gemainlich vnuerzogenlich ze samen manen, so súllen wir denne aber ze samen sitzen vnd in hilffe schepfen vnd nach v´nsern eren vnd aiden erkennen, wez man dazů notdurfftig sy vnd alz div sache an ir selb gestalt ist vnd ouch darzů vnuerzogenlichen ziehen vnd keren in aller der wise, so vorgeschriben stat, vnd ze gelicher wise, alz ob ez v´nser selbz sache wa^er, a^vn alle arglist vnd geuerd. Wa^er aber, daz die vorgenanten fúrsten vnd herren von O^esterich selb in land nit enweren, wenn sich denne ir lantvo^egt an ir stat in den obgeschriben landen vnd kraissen mit namen her Ludwig von Hornstain³⁴ vnd her Go^etfrid der Múller³⁵ oder ob ir ainer oder si beid in der wile abgiengen in landz nit enweren oder entsetzt wúrden, ander, die von den obgenanten fúrsten vnd herren gesetzet oder den div obgenanten land vnd gebiete enpfolhen oder an ir stat gesetzt wúrden, baid gemainlich vnd darzů a^echt vnsers ratz oder ir entwedra besunder vnd mit im vier v´nsers ratz die nechsten bi in vnd die si darzů gehan múgen vf ir ere vnd aid erkennend, daz si v´nser hilff bedúrffend wurden vnd hân mu^esten, alz vorgeschriben stat, daz sullen si v^ens verkúnden vnd darumb ermanen in aller der wis, alz vor von wort ze wort begriffen vnd verschriben ist, so súllen wir v^ens denne aber vff v´nser ere vnd aid erkennen, waz hilf in darzů notdúrfftig sy nach dem, alz denne div sach an ir selb gestalt ist, vnd súllen ouch denne mit der selben v´nser hilf, alz wir v^ens denne vf die aid erkennt haben, darzů vnuerzogen(lich) zů ziehen vnd keren alz lang, biz div sach erobert wirt vnd der schad wúrd abgeleit, a^vn alle geuerd. Wa^er ouch, daz so^elich lo^euff vnd sach zwischan v^ens vnd in der zit, alz dirr v´nser bund gemachet ist vnd weren sol, vff stu^enden oder wu^echsen, daz man geligers oder besezzes vor ainer stat vestin oder schloz bedúrffen wúrden oder hân mu^esten, wa^er denn, daz so^elichiv geliger zů giengen vnd bescha^ehen den vorgenanten v´nsern herren von O^esterich oder den iren ze dienst oder ze liebin vnd von iren wegen, so súllen si, waz kost oder schadens darúber wachsent wúrd vnd gieng von ziuges wegen, dargeben vnd vssrichten v^ens a^vn schaden, doch daz wir in vnser geziug vnd werklúte, ob si der darzů bedúrffen vnd v^ens darumb bitten oder manend, dar lihen súllen a^vn widerrede. Bescha^ehen aber so^elichiv geliger vnd besa^ezz v^ens ze dienst vnd von v´nsern wegen, so súllen wir, waz kost oder schadens von ziugez wegen darúber gieng vnd wachsent wúrd, dargeben vnd vsrichten in a^vn schaden, doch daz si v^ens ir geziug vnd werklúte darzů ouch lihen sullen, ob wir der bedúrffen vnd si darumb bitten oder manen, alz ouch vorgeschriban stat. Sunderlich so ist berett vnd sien ouch mit den vorgenanten v´nsern herren von O^esterich ietzo durch luter gůt vnd vmb kúnftig sache vnd zwaiung ze wenden vnd ze verkomen in ain komen, wa^er daz dehain v´nser statt oder stett burger zů der vorgenanten v´nser herren von O^esterich lúten oder stat burgern am oder me, die in den vorgenanten iren landen vnd kraissen gelegen sint, si weren edel oder vn edel, vnd die in stetten gesezzen sint in der zit vnd frist, alz diser v´nser bund weren sol vnd gemachet ist, icht ze sprechen ze beklagen oder ze schaffen hetten oder gewunnen, waz oder warumb daz wa^er, daz wir in darumb nachfaren súllen an die stett, da ouch si burger vnd gesezzen sint, vnd da recht von in sůchen vnd nemen vor ir stat amptman vnd v^ens dez da vnd waz v^ens da mit recht ertailt wirt, benu^egen lassen a^vn widerrede, vnd doch daz si mit den selben iren stetten oder stat schaffen vnd fu^egen súllen, daz den v´nsern furderlich gericht werd vnd div sach ain end na^em vnd nit lenger verzogen wúrd. Dezgelichen súllen v^ens der obgenanten v´nser herren stette vnd aller ir stett burger vnd ouch alle ir diener, ez sien herren ritter oder knecht oder wie die genant sint vnd die in den obgeschriben iren landen vnd kraissen gelegen sint, herwider vmb verpflicht vnd gebunden sin, waz si oder kain ir stat oder stett burger ald dehain ir diener in den obgeschriben landen oder kraissen an v´nser stett oder stett burger dehain, ez sien edel oder vnedel vnd die in v´nsern stetten gesezzen sint, ze sprechen oder ze klagen hetten oder gewunnen, daz si v^ens darumb in die selben v´nser stett vnd da ouch wir sezzhaft vnd burger sien ouch nachfaren súllen vnd da recht vor der selben v´nser stett amptlúten von v^ens sůchen vnd nemen vnd sich dez ouch wol von v^ens benu^egen lassen a^vn widerred vnd doch daz wir vnd alle die v´nsern schaffen vnd fu^egen súllen, daz in ouch furderlich gericht vnd recht nit verzogen werd, alz vorgeschriben stat. Wa^er aber, daz v´nser vorgenanten richs stette dehain ain oder me ald dehain v´nser burger an der vorgeschriben v´nser herren von O^esterich diener dehainen in den obgeschriben landen vnd kraissen, ez weren herren ritter oder knecht vnd die nit in gemureten gerichten hus vnd ha^eblich gesezzen sint vnd die doch in lantgericht geho^erent, v´tzit ze sprechent ze beklagend oder ze schaffen hetten oder gewunnen, vmb waz sach daz we^ar oder wie sich daz fůgty, dez sullen wir ze baider syt ze tagen komen vf ainen gemainen man in der wise, alz hin nach begriffen vnd verschriben stat. Ist, daz div sache in der vorgeschriben v´nser herren von O^esterich vndren lantvogty ist vnd in den gebieten vnd riuiern, die darzů geho^erent, so súllen wir gen in ze tagen riten vnd komen gen Ehingen³⁶ in die stat, ez wa^er denne, daz div sach an gieng v´nser stett in dem Albgo^ewe³⁷ vnd die selben kraissen vnd riuiern gelegen sint, so súllen wir darumb ze tagen riten gen Bybrach in die statt vnd súllen ouch den, da wir oder v´nser burger, die also zů in ze klagen oder ze sprechen hetten, ze ainem gemainen man nemen den edlen vnd wolgebornen junkher Eberh. von Lupfen lantgraf ze Stu^elingen vnd burggraue ze Tyrol³⁸, hern Ludwigen von Hornstain der vorgenanten v´nser herren lantvogt in Swaben, oder hern Hansen vom Stain von Marchteln³⁹ ritter, welhen wir denne vnder den drien wellen, vnd sol ietwedra tail ainen oder zwen erber man darzů setzen, vnd dieselben súllent denn besu^echen, ob si die sache mit ainer minne verrichten můgen, mo^echt aber daz nit gesin, so sol vf die selben fúnf oder dry man nach baider tail klag red vnd widerred beschehen darumb, waz recht sy, vnd sol ouch dez baid tail wol benu^egen. Bescha^ehen aber so^elich zůsprúch in der obgenanten v´nsren herren von O^esterich lantvogtie vnd enund Rines⁴⁰, so súllen wir darumb ze tagen riten gen Schaufhusen⁴¹, gen Stain⁴², gen Diessenhouen⁴³ oder gen Zelle⁴⁴, in der vier stett ain, wederhalb ie denn der gemain man wil, ez wa^er denne, daz baid tail ander gelegen tag mit dez gemainen mannez willen v´ber ain ko^eme, ez we^ar in der vndern oder in der obern lantvogty, da bi sol ez ouch beliben, vnd da selbz súllen denne wir oder die v´nsern ze ainem gemainen man nemen der vorgenanten v´nser herren lantvo^egt hern Go^etfrid den Múller vnd Hansen von Bodmen⁴⁵ den alten ritter, Hansen von Bonstetten vogt ze Kyburg⁴⁶ oder Hainrichen von Randegk vogt ze Schaufhusen⁴⁷, welhen wir denne vnder den vieren wellen, vnd sol ietwedra tail ainen oder zwen erber man aber darzů setzen vnd geben, alz vorgeschriben stat, vnd die selben súllen denn die sach aber mit minne oder mit dem rechten vstragen vnd enden in aller der wise, alz vor geschriben stât, a^vn alle geuerd, doch mit so^elichem gedinge, ob daz wer, daz der tail dehainer in aucht oder in ban we^ar, daz daz entwederm tail an dem rechten kainen schaden bringen sol vnd gentzlich stille ligen sol, alle die wile daz recht weret, also daz si mit namen die gemainen weder vf aucht noch uf benne nit ertailen súllen, vnd weler ouch also von v^ens oder von den v^ensern der vorgenanten siben manne ainen zů ainem gemainem man erkuiset oder erwelet, der sol sich nit widern noch sperren bi den aiden, die si darumb gesworn hânt, wan ouch si alle siben gesworn hând gelert aid, die sache ze enden vnd nach iren eren vszetragen a^vn alle geuerd, alz vorgeschriben stat. Sunderlich so ist berett vmb angeuallniv gůt vnd die entwedra tail in gewer hat, daz man die berechten sol an den stetten, da ouch si gelegen sint, ez sy in stetten oder vf dem land, vnd also súllen wir die obgeschriben dez hailigen richs stett mit allen den vnsren bestellen vsstragen vnd verkomen, so wir best múgen, a^vn alle geuerd, daz der obgeschriben v´nser herren von O^esterich stette noch burger noch dehain ir lantvogt noch diener weder herren ritter noch knecht in den vorgeschriben landen vnd kraissen a^vn recht darüber nit angriffen noch pfenden in dehain wise. Bescha^ech aber dehain v´bergriff darúber, den súllen wir schaffen widertan vnd ledig lazzen vnd daz si darnach zů dem rechten komen in aller der wise, so vorgeschriben stat, a^vn alle geuerd. Wir haben ouch mit namen vmb alle verbriefet schuld vnd vnlougenbêr gúlt vnd vmb hůbgelt vogtrecht stiur vnd zins aller menglich vnd iederman alliv siniv recht behalten vnd vzgesetzt, alz daz von alter her komen ist, a^vn alle geuerd, denn so verre vnd allain dez vsgesetzt, waz die vorgeschriben v´nser herren vnd fúrsten von O^esterich oder ir vordern schuld oder gaub vmb dienst verschriben vnd verhaizzen haben, daz wir nyemen ze burger noch weder in v´nsern bund enpfahen noch yn nemen súllen, alle die wile diser v´nser bund weret, den wir darumb gen in beholffen oder beraten sien noch si darumb dehaines wegs weder no^eten oder pfenden noch kain den iren in dehain wise, wan ouch daz die selben v´nser herren mit namen gen v´ns verdient vnd abgeteidinget hând, aber vmb ander schuldan vnd die in gelihen sint súllen iederman alliv iriv recht behalten sin, alz in daz verschriben vnd verhaissen ist. Ouch ist berett, daz wir die obgeschriben dez hailigen richs stett vnd alle v´nser burger gen den vorgeschriben v´nsern herren von O^esterich vnd gen iren lantvo^egten vnd ouch gen allen iren stetten vnd dienern, ez sien herren ritter oder knecht, in den obgeschriben iren landen vnd kraissen vnd die selben v´nser herren von O^esterich vnd ir lantvo^egt vnd ouch all ir stett vnd diener herwiderumb gen v^ens vnd allen v´nsern burgern ietweder tail by siner gerůweter nutzlicher gewer, alz er die biz vff disen huitigen tag ynne gehebt vnd herbracht hat, nů fúrbaz mer beliben sol vngehindert vnd vnbekúmbert a^vn alle geuerd. Wa^er aber, daz die ob geschriben v´nser herren vnd fúrsten von O^esterich oder ir lantvo^egt von iren wegen yeman ze diener nů fúr sich hin von huit dem tag, alz dir brief geben ist, ynna^emen oder enpfiengen, die súllen si doch mit so^elicher beschaidenhait ynnemen vnd enpfahen, daz si den alle alt sache, die si mit v^ens oder mit den v´nsern ze schaffen oder ze tůnd hetten, mit namen vz setzen súllen vnd daz si die darumb nichtz gen v^ens schirmen súllen noch sich vmb die an nemen. Dez gelichen súllen wir den obgenanten herren von O^esterich hinwider ouch verbunden sin, daz wir nyemen weder ze burger noch in v´nsern bund haymen noch enpfahen súllen, denn daz wir den alle alt sache ouch súllen vz setzen gen in vnd den iren vnd v^ens darumb nichtz an nemen, alz ouch vorgeschriben stat. Ouch ist berett, ob daz wer, daz kain der v´nser vnd der v^ens zů geho^ert, wer der wer oder wie der genant we^ar, nit gehorsam sin wo^elt vnd die vorgeschriben stuk vnd artikel nit halten vnd vollfu^eren wo^elt, alz vor geschriben stat, daz wir v^ens denne vmb den selben nichtz fúro an nemen súllen noch den schirmen noch versprechen in dehain wise vnd súllen ouch denn fúrbaz den obgenanten v´nsern herren von O^esterich vnd iren lantvo^egten stetten vnd ouch dyenern gen den beholffen sin. Wa^er aber, daz wir den oder die selben, die also vngehorsam wúrden, selb straffen wo^elten, bedo^erfften wir denne der ob geschriben v´nser herren oder der iren in den vor geschriben iren landen vnd krayssen hilff darzů, dez súllen sy v^ens beholffen sin a^vn widerrede. Wir haben v^ens ouch zů den obgenanten fúrsten vnd herren sunderlich also ouch verbunden, wa^er daz ieman sy oder die iren in den obgeschriben iren landen vnd kraissen wo^elt vehen oder vigenschafft an tragen vmb die angriff oder sache, die in disem v´nserm bund in beschehen oder widerfaren weren oder daz wir icht krieg brúch oder sto^ezz vf die zit, alz diser v´nser bund vssgieng vnd ain end hett, vorhanden oder ze schaffen hetten oder gewunnen vnd die sich doch in vnserm bund erhebt vnd angefangen hetten, wie oder mit wem daz wa^er, vnd darumb vnd ouch vor hin vnd e, daz dirr v´nser bund ain end hett vnd vz gie, ermant wa^er, daz wir in daz dennocht súllen vnd wellen helffen erobern vnd vstragen nach dem zit, alz diser v^enser bund ain end hat, biz daz div sach gentzlich verricht wirt, a^vn alle geua^erd. Wir nemen ouch in disen v´nsern bund alle lantfarer bilgrin koufflút vnd koufmanschatz, daz wir die in den obgeschriben v´nsern gebieten vnd kraissen getriuwelichen befriden vnd beschirmen súllen a^vn alle geuerd, vnd wa^er, daz entwedern tail vnder v^ens darumb v´tzit angieng, dem sol der ander tail dazů beholfen sin a^vn all geuerd. Wa^er ouch, daz der vorgenanten v´nser herren lantvo^egt der ain oder si beid in der wile von tod ab giengen, da got vor sy, oder entsetzt wúrd ald daz die obgeschriben v´nser herren von O^esterich in den egenanten iren landen vnd kraissen allen nů ainen lantvogt hân wo^elten oder daz die egenanten lantfo^egt in landz nit enweren, so súllen die obgenanten v´nser herren, ob sy in land sint, oder an ir stat der lantfogt, den si denn gesetzt hetten oder beliben wa^er, schaffen vnd fu^egen, wer denne die selben land vnd gebiet von der obgeschriben fúrsten vnd herren wegen ynne hett oder die enpfolhen wúrden, daz der selb ouch swer disen bund vnd alle ander vorgeschriben sache vz ze richten vnd ze vollfu^eren a^vn alle geuerd vnd alz vorgeschriben stat. Wa^er ouch, daz in der obgeschriben v´nserr herren von O^esterich stetten vnd die in den obgeschriben kraissen vnd landen gelegen sint dehain ir amptman vnd der den bund gesworn hat in der wile ouch abgieng oder entsetzt wúrd, so súllen der obgeschriben v´nser herren lantfo^egt oder die an ir stat gesetzt würden bi den aiden, die sy gesworn hând, alz bald ain ander amptman gesetzt wúrden, versorgen, daz in die disen bund ouch sweren in aller der wise, alz vor der abgegangen getân hat, a^vn alle geuerd. Gieng ouch der vorgenanten gemainen man ainer oder me in der wile ab von tod oder von land fu^eri oder der vorgeschriben v´nser herren von O^esterich rat nit wa^er oder sus darzů nit komen mo^echten a^vn alle geua^erd, wie sich daz fůgty, so súllen die obgeschriben v´nser herren von O^esterich ald an ir stat ir lantvogt, ob sy in landz nit enweren, v^ens vorgenanten stetten allwegen ander mit v´nserm willen vzzer irem rat an der abgegangen stat, in welher riuier der abgegangen ist, vngeuarlich geben vnd súllen ouch mit dem selben schaffen vnd fu^egen, daz die ouch sweren in aller der wise, alz vormalz die abgegangen getan hânt, a^vn alle geuerd. Wan aber wir vor daz hailig riche mit namen vz gesetzt haben vnd a^elliv siniv recht behalten haben, dazů so setzen vnd^c) nemen wir ouch in disem v´nserm bund vzz den allerdurchlúchtigosten fúrsten vnd herren hern Karlen von gottez genaden Ro^emischer kayser ze allen ziten merer dez richs vnd kunig ze Beheim vnd darzů v´nsern herren den künig, daz wir wider die von diz bundz wegen nit sin súllen noch tůn wellen, a^vn alle geuerd. Darzů nemen wir vzz den durchlúchtigen fúrsten vnd herren herzog Fridrich von Payern⁴⁸, daz wir wider den ouch nit tůn wellen in der wise, wa^er daz in die obgenanten fúrsten vnd herren von O^esterich oder die iren wider rechtz ta^eten, darzů su^ellen wir den selben v´nsern herren von O^esterich noch den iren nit beholffen sin. Wa^er aber, daz der vorgenant v´nser herre herzog Fridrich von Paygern oder die sinen die vorgenanten v´nser herren von O^esterich oder die iren in den vorgenanten landen vnd kraissen, da mit si sich zů v´ns verbunden hânt, wider rechtz an griffen oder beschadgen wo^elte, darzů súllen wir den obgeschriben v´nsern herren von O^esterich vnd den iren beholffen sin, alz vorgeschriben stat, a^vn alle geua^erd. Vnd dez alles ze ainem waren vrkúnd vnd daz ez sta^et belibe geben wir vorgenanten dez hailigen richs stett alle, alz wir mit namen an disem brieff vorgenant sien, den obgenanten herren von O^esterich disen brief besigelten mit v´nser aller stette gemainen insigeln, div wir alliv offenlich daran gehenkt haben. Der geben ist dez nechsten sampztagz vor sant Valentins tag, do man zalt von Cristz gebúrte drivzehen hundert jar vnd darnach in dem acht vnd sybentzigosten jare.

Source Fulltext: Chartularium Sangallense IX, Nr. 5630, S. 302-309.