Vicarius reverendi in Christo patris et domini Hainr. dei gracia episcopi Const(anciensis) in spiritualibus generalis || anno domini millesimo CCC^mo LXX^mo septimo feria tercia proxima post festum sancti Jacobi apostoli || hora primarum assignata per nos pro termino parti ree ad deliberandum super exceptionibus || pridem per partem agent(is) coram nobis exhibitis atque productis ipsisque ad respondendum precise et peremptorie in causa mota coram nobis inter providos discretos magistrumcivium consules scabinos oppidanos et universitatem oppidi sancti Galli Const(anciensis) dyocesis ex una et Johannem dictum Burgower presbiterum vicarium perpetuum ecclesie parrochialis sancti Laurencii oppidi eiusdem se pretendentem de et super hesitacione, qua ipsi magistercivium consules oppidani scabini et universitas ac subditi hesitant, an et utrum ipse dominus Johannes eidem ecclesie preesse ipsisque subditis ecclesiastica sacramenta ministrare et curam animarum subditorum eiusdem ecclesie sancti Laurencii regere valeat seu possit de iure ex parte altera, comparuerunt coram nobis Conr. dictus Burg notarius curie Const(anciensis) procurator et procuratorio nomine dictorum actorum ex una et prefatus Johannes Burgower reus personaliter ex parte altera, et dictis partibus taliter coram nobis comparentibus prefatus Johannes reus dixit se in causa presenti advocatum nondum habere sibique ante omnia de advocato provideri petivit, quem nisi haberet huiusmodi termino satisfacere non posset petendo, ut sit sibi alium terminum ad respondendum huiusmodi exceptionibus per nos statui et assignari. Prefatus vero Conr. Burg procurator procuratorio nomine quo supra dixit et publice protestabatur, quod omnino in huiusmodi termini prorogationem et alterius assignationem nullatenus consentiret nec consentire vellet nee premissa per nos fieri debere asseruit, sed ipsi Johanni reo viam ulterius proponendi seu ipsis exceptionibus contradicendi ipsisque respondendi per nos precludi cum instancia postulavit, prefato Johanni reo illud fieri non debere dicente et respondente se nulluni advocatum habere pretendente sibique de eodem providere petente, et dictis Partibus aliquamdiu taliter coram nobis altercantibus tandem terminum prefigendum duximus et prefigimus videlicet feriam terciam proximam ante festum sancti Laurencii martiris hora primarum dicto Johanni reo ad conducendum advocatum nobisque ad deliberandum an et utrum ipsum Johannem reum ultra admittere debeamus ad respondendum exceptionibus prefatis vel sibi viam precludere, ad premissa et iuxta petita ipsius Conradi facere et procedere debeamus de iure, et ut sit ipso termino partibus eisdem nostrum intentum explicandum, sicque dicte partes a nobis licenciati abierunt et recesserunt. Dat. ut supra.

Source Fulltext: Chartularium Sangallense IX, Nr. 5598, S. 270-271.