Ich^a) Chůnrat vom Stain¹ gesezzen ze Elrbach² vergich offenlich vnd tůn kunt aller menglich mit disem brieff vmb den || bund, den dez hailigen nachgeschriben richs stett in Swaben Vlme, Costentz, Memmingen, Rotwil, Rútlingen, Wile, || Rauenspurg, V´berlingen, Lindowe, sant Gallen, Bybrach, Kemptun, Isenin, Liukirch, Wangen, Kouffbúren vnd Bůchorn || gelopt vnd gesworn haben, bekenne ich an disem brieff, daz ich noch dehain min amptman diener noch helffer noch niemen, der mir zůgeho^ert, wider die vorbenempten dez richs stett noch wider dehain ander ir aidgenozzen, die ietzo in irem bund bi in sint noch die fúrbaz zů in daryn kemen oder swu^eren, nit sin súllen noch wellen noch si nit beschadgen súllen hie zwischan vnd dem nechsten sant Go^eryen tag vnd danach in vier gantzen jaren den nechsten deweder mit kost noch mit behusung iren vinden ze geben noch mit lib noch mit gůt mit ra^eten noch mit geta^eten haimlich noch offenlich noch in dehainen weg in aller der wise, alz ir bund stat vnd seit. Vnd dez hân ich ietzo ze den hailigen ainen gelerten aid gesworn mit vffgebotten vingern, war vnd stet ze halten vnd ze haben âne alle geuerd. Dez ze vrku^end hân ich min insigel gehenkt an disen brieff. Der geben wart an sant Martins abent, do waren von Cristz gebu^ert drivzehenhundert jar vnd in dem sechs vnd sybentzigistem jar.

Source Fulltext: Chartularium Sangallense IX, Nr. 5542, S. 215.