Allen^b) den, die disen brief ansehent oder ho^erent lesen, kúnde ich Berchtolt Schna^epffo vnd Katherina sin eliche wirtinn burger ze || Rapreswil¹ vnd veriehen offenlich mit disem brief, als v´ns^c) der hochwirdig fúrst v´nser gnêdiger herre byschof Heinriche || von Costentz² mit der erwirdigen herren . . dez cappittels gemeinlich ze dem thůme ze Costentz willen vnd || gúnste versetzt hat dis nach geschribnen quarten, dez ersten dú quart der kilchen ze Busskilchen³, die quart der kilchen ze Frijenbach⁴ vnd die quart der kilchen ze Vffno^vwe⁵ mit allen nútzzen rechtummge^d) gewonheit vnd zů geho^erd, als v´nser ho^vptbrief wist vnd seit, den wir dar vmb inne haben von dem obgenanten hochwirdigen herren byschof Heinr. von Costentz vnd von dem cappittel, vmb drú hundert guldin, mit den gedingen vnd mit der bescheidenheit, daz der selb hochwirdig herre byschof Heinr. von Costentz vnd alle sin nachkomen alweg ste^ettenklich dz recht vnd vollen gewalt haben sont, daz er die obgenanten quarten alle drije mit allen nútzzen rechten gewonheit vnd zů geho^erde wol an sich wider lo^esen sol vnd mag mit drin hundert guldinen gůter vnd geber an gold vnd an gewicht ze Costentz an dem wechsel, wenne vnd weles jares er wil vnd v´ns mit den egenanten guldinen allen ermanot vnd der mit enander gewert werdent vor sant Johans tag ze súngichten an die nútze der selben quarten. Beschicht aber dú losunng nach sant Johans tag ze súngichten, weles jars daz wêr, so sont v´ns ald v´nseren kinden ald der erben, ob sú enweren, die selben nútz des jars von den drin quarten veruallen sin vnd v´ns gelangen vnd werden an alle wider rede vnd nit fúrbasser. Wir der obgenannt Berchtolt Schna^epffo vnd Katherina min eliche wirtinn sont vnd loben o^vch mit gůten trúwen fúr v´ns vnd v´nsrú kind vnd der erben vnd alle ir nachkomen, ob sú enwere, die obgenanten drij quarten mit allen nútzzen vnd rechtunnge wider ze lo^esenn geben, wenne vnd weles jars der obgenant hochwirdig herre byschof Heinr. von Costentz ald sin nachkomen ald ieman von sinen wegen koment vnd die quarten wider lo^esen wênd. Vnd sol o^vch im ald sinen nachkomen der selben losung nieman vorsin noch mit deheinen sachen da wider tůn noch reden an alle geuerde, es sie vor sant Johans tag ze súngichten ald dar nach, als vor geschriben stat. Vnd dez zů einem warem vrkúnde vnd gantzer sicherheit so hab ich Berchtolt Schna^epffo min eigen insigel fúr mich vnd Katherinen min eliche wirtinn vnd fúr v´nser kind vnd der erben offenlich gehenkt an disen brief, vnder daz selb insigel ich dú obgenant Katherina mich willeklich binde in dirre sach, won ich eigens insigels nit han. Dirre brief ist geben an dem meijen tage in dem jar, do man zalte von gottez gebúrte drúzehenhundert vnd sibentzig jar vnd dar nach in dem sechsten jare.

Source Fulltext: Chartularium Sangallense IX, Nr. 5505, S. 175-176.