Nos Georius dei gracia abbas totusque conventus monasterii sancti Galli¹ ordinis sancti Benedicti Constanciensis diocesis sedi apostolice immediate subiecti omnibus presencium inspectoribus salutem et sinceram in domino^a) caritatem. Cum nos arduis nostri monasterii predicti negociis simus multipliciter prepediti, quod collacionibus ecclesiarum feodorum seu aliorum iurium quorumcumque in partibus Lombardie^b)2 existencium nobis et nostro monasterio prefato pertinencium nequeamus presencialiter interesse, hinc est, quod religiosum in Christo fratrem Eglolffum de Altstetten³ conventualem seu monachum monasterii Fabariensis⁴ ordinis sancti Benedicti Curiensis diocesis presentibus constituimus nostrum verum et legitimum procuratorem ac tutorem dantes eidem plenam ac liberam potestatem nomine nostro memoratas ecclesias feodalia seu alia iura et specialiter vallem Essula⁵ nuncupatam continentem duas alpes ac vallem dictam in Bimianck⁶ continentem unam alpem nostro monasterio pertinencia conferendi locandi fructus eorundem percipiendi ac omnia alia circa predicta faciendi, que personaliter faceremus, si presentes essemus, ratum et gratum habituros, quidquid per dictum nostrum procuratorem seu tutorem actum factum ac attemptatum fuerit in premissis. In quorum omnium testimonium sigilla nostra abbacye et conventus presentibus sunt appensa. Datum in oppido nostro Wyl⁷ anno domini M°CCC^moLXX^mo primo, die iovis, que fuit sexta dies mensis decembris.

Source Fulltext: Chartularium Sangallense IX, Nr. 5482, S. 151.