Wir der burgermaister die ra^et vnd die burger gemainlich der stat ze sant Gallen tůn kunt vnd veriehen offenlich mit disem || brieue vor allen den, die in ansehen oder ho^eren lesen, das wir schuldig sint vnd gelten súllent reht vnd redelichen || vnd v´nser nach komen den wol erbornen herren graf Hugen, gra^vf Albreht dem eltern, graf Hainrichen vnd gra^vf Albreht || dem jungeren von Werdenberg vnd vom Hailgenberg¹ gebrůdern vnd iren erben, ob si enwerint, tusent guldin gůter an dem gold vnd wol gewegner oder fúnf hundert pfund pfenning gůter Costentzer múns fúr die selben guldin, wedres wir danne wellint, von der dienst vnd hilf wegen, die si v´ns dar vmb gelobt vnd verhaissen hant, als der brief wol wiset, den si v´ns dar úber geben hant. Die selben guldin oder die pfenning, wedres wir denne wellint, súllen wir in geben vnd ga^entzlich rihten ze dem zwelften tag nah wihenneht dem nehsten, der nu kunt nah dem tag, als dirre brief geben ist. Wir veriehen o^vch mit vrkúnd dis briefs, bescha^ech das v´nser herre der abt ze sant Gallen oder iemen andre ma^ehtiger sto^ez oder crieg mit v´ns gewunen, das wir die vorgenanten herren vmb hilf an růften vnd mantint vnd weltint, das si von v´nseren wegen wider saiten vnd v´ns beholfen wa^erint, das si das vnuerzogenlich tůn sont. Vnd wenne das bescha^ehe, das si von v´nser manung wegen also wider saiten, ald ob sich fůgti, das si von v´nser manung wegen iemen andre, es wa^erint ritter oder kneht, wider saiten vnd sú von des selben widersagens wegen an griffen vnd geschadget wrdent mit rob oder mit brand, weles vnder den bescha^ehe, so ist mit namen bedinget vnd berett, das wir in dar na^vch in wendig den nehsten zwain manoden o^vch tusent guldin gůter an dem gold vnd wol gewegner oder fúnf hundert pfund pfenning gůter Costentzer múns fúr die selben guldin, wedres wir danne wellint, geben vnd rihten súllen. Wa^er aber, das wir in die vor geschriben tusent guldin oder die fúnf hundert pfund pfenning fúr die selben guldin, wedres wir danne wellint, niht rihten vnd ga^eben gantzlich vnd gar ze dem vorgeschriben nehsten zwelften tag nach wihenneht, ald ob sich fůgti, das wir in die nach genden tusent guldin veruielint, die wir in nah dem, so si veruallen wa^erint, inrent den nehsten zwain manoten geben súllen, niht rihten vnd ga^ebint, als vor ist beschaiden, so hant die vorgenanten herren von Werdenberg vnd iro helfer vollen gewalt vnd friges vrlob, ie dar nach, wenne sú wellint, v´ns vnd v´nser nach ko^vmen ze pfenden ze no^eten ze heften vnd an ze griffen an lút vnd an gůt, wie vnd wa si das getůn mugent als vil vnd als lang, v´ntz das si ie des selben verfallen gůtes, dar vmb sich denne tag ergangen hant, gantzlich gewert werdint. Vnd sol v´ns no^vch vnser nach komen no^vch v´nser lút noch gůt hie vor noch hie wider niht gůt sin kain frihait kain gewonhait kain burgreht kain puntnúst kain lantfrit no^vch kain reht des landes no^vch der stett no^vch kainer lay ander sach no^vch fúrzug, vnd ka^emin sú oder iro helfer der selben pfandung ze gewonlichem schaden, den schaden súllen wir in och gantzlich ablegen vnd abtůn. Ze ainem waren vrkúnd aller vor geschribnen ding vnd geding so habin wir v´nser stat insigel ze sant Gallen^a) an disen brief, der geben ist ze sant Gallen an sant Gregorien tag, do man von Cristus gebúrt zalt drúzehenhundert jar, sibentzig jare vnd da nach in dem dritten jare.

Source Fulltext: Chartularium Sangallense IX, Nr. 5345, S. 11-12.