Wir Wilhelm von gottes genaden abt des gotzhus von sant Gallen¹ kundent allen den, die disen brief iemer angesechend || ald ho^erend lesen, dz fur vns komend die fromen ersamen lut Růdolf von Langenhart² den rehten namen, dem man || nu sprichet Růdolf Balg von Gerswile³, vnd frů Beat von Wertach⁴ sin elichu wirten, die vnser vnd vnsers gotzhus ze sant || Gallen erbern getrwen dienstlut sint von allen iren vordran, dz vns kunt vnd vissend ist, ir sont alle wisen fur wars, dz wir an habind gesehen die grossen trw vnd den biderben dienst, den vns vnd vnserm gotzhus Růdolf von Langenhart dike vntz her het getan vnd noch tůn mag, vnd vmb sinen getrwen dienst vnd durch siner bett willen so lichen vnd geben wir im vnd frw^v Beaten sine elicher wirtenn vnd allen den kinden, du von inan iemer geboren werdent ald geboren sint, vnd iran kinden kinden vnd allen iran nachkomen friges burger reht in vnser stat ze sant Gallen mit aller der frighait vnd den rehten, so mit den selben Worten begriffen vnd beslossen, also dz su dz selb burger reht vnd vnser gab, die wir inan tůegind fur vns vnd vnser nachkomen, haben in allem dem reht, alz es ander lut hand, die von alter friges burgerreht hand gehept in der stat sant Gallen vnd von reht vnd von gewonhait haben sond, vnd dar vmb dz den vor genanten Růdolfen vnd frv^o Beaten vnd allu du kind, die von inan iemer geboren werdent oder geboren sint, es sigint to^ehtran oder knaben, wa su sint vff dem land ald in den stetten, von vns noch von vnsern nachkomen noch von nieman andern von vns noch von vnsers gotzhus wegen an dem selben burgerreht niemer werden beswa^ert noch bekrent an ira tod noch vor iren tod weder mit geriht noch an geriht, dz habin wir inan gelobt mit vnser hand fur vns vnd vnser nachkomen vnd habint o^vch fur vns vnd all vnser nachkomen die gnade vnd du reht inan frilich vnd willenklich geben vnd getan, also dz su dz selbe burgerreht gen vns noch gen vnsern nachkomen niemer mugent verlieren mit en kainen dingen vnd sunderlich weder mit wiben noch mit mannen noch mit ain kainen andren sachen, su sigint benempt ald vnbenempt, wan dz su vnd allu ira kint vnd ira kint kint vnd all ira nachkomen iemer me in der frighait beliben sont, als vor beschriben stat an disem brief. Wa^er o^vch aber, dz ieman vnd sunderlich von vns ald von vnserm gotzhus wegen kainer schlat reht ald vordrung woltin han an ira lib ald an ira gůt, denn hie vor geschriben stat, des sont su vnd ira erben sin vnd werden mit disem brief ledig vnd los vnd vnhaft an allen gerihten an gaistlich an weltlich, es sig vff dem land ald in den stetten, wa ald wie es ze schulden kumt ald su es bedurfent. Vnd des ze warem vnd offem vrkund vnd gůter vnd gantzer sicherhaid alles des von vns geschriben stat an disem brief, geben wir vor genant abt Wilhelm den vor genanten Růdolfen von Langenhart, den man nempt Růdolf der Balg von Gerswile, vnd frv^o Beaten von Wertach siner elichen wirtenn vnd allen den kinden, du iemer von inan geborn werdent oder geboren sint, vnd ira kinds kinden vnd allen ira nach komen fur vns vnd all vnser nachkomen vnser insigel an disen brief. Der geben ist ze sant Gallen in vnserm hoff in dem jare, do man zalt von Cristes geburt zwo^elfhundert nuntzig jar in dem sibenden jar, an dem zinstag vor sant Jacobs tag des zwelfbotten.

Source Fulltext: Chartularium Sangallense IV, Nr. 2431*, S. 496-497.