In gottes namen amen. Wir her Lvtolt vnd her Cv^onrat gebrůder von || Landegge¹ kvnden allen, die disen gegenwurtigen brief an seihent alder ho^erent || lesen, das alles das gůt ze Slattingen², das Wilhaln seilich zer Linden von Schafusen³ || von vns hatte, vnser reht lehin was von Kiburch⁴, vnd das wir die selben lehinschaft widir vf ze Kiburch an die herschaft habin gesent, vnd vnziehin vns alles des rehtes vnd aller der lehenschaft, so wir ie gewunnen zv^o dem vorgenandem gůtte, an die vorgenanden herschaft ze Kiburch, vnd vmbe die minne vnd die liebi, so vns des vorgenanden Willehalmes seiligen kint zer Linden von Schafusen haint getân, so bitten wir die herschaft von Kiburch, das sv das vorgenande gůt ze Slattingen des vorgenanden Wilhalmes seiligen zer Linden kinden ze rehtem lêhin lihe. Vnd das dis war sye vnd o^vch steite belibe, darvmbe geben wir die vorgenanden von Landegge den vorgenanden kinden disen brief beuestet mit vnseren insigeln zainem steiten vrkvnde. Dis bischach an dem lanttage zer Lo^vben⁵ bi Frowenuelt⁶, do man von gottes geburte zalte zwelfhundert iar vnd nunzich iar vnd ain iar, an der mitchen nach der manneuasenaht.

Source Fulltext: Chartularium Sangallense IV, Nr. 2268, S. 377.