In nomine domini amen. Nos Chůnradus dei gratia abbas . . totusque conventus monasterii Fabariensis¹ universis Christi fidelibus presencium inspectoribus salutem cum noticia subscriptorum. Ne acta hominum, que || fiunt in tempore, cum eodem labantur, poni solent in lingua testium et scripture solent memorie commendari. Noverint igitur universi, quos nosce fuerit oportunum, quod controversia orta inter nos ex una || et hospitale seu procuratores hospitalis pauperum in Rappresswile² ex parte altera super possessionibus bonorum spectancium ad villam Bůzkilch³ et specialiter super ortis seu hiis possessio||nibus, que cum inculte fuerant in vulgari dicebantur gemeinmerke, quas possessiones unâ cum aliis, que super hoc^a) confecto in instrumento⁴ conscripte sunt, dictum hospitale et sui procuratores se a venerabili in Christo pie recordacionis Chůnrado quondam abbate Fabariensi⁵ nostro predecessore pro XI marcis argenti comparasse asserunt, habita inter nos et predictum hospitale seu procuratores ipsius de prudentum super hoc convocatorum virorum consilio conposicione amicabili extitit quietata et finaliter hoc modo determinata, quod prefatum hospitale dictas in Bůzkilch, de quibus orta fuerat questio, possessiones sicut et alias ibidem possessiones singulas, ut predicto in instrumento tacte sunt^b), totaliter possideat pleno usu, reservatis tamen nobis possessionibus illis, que specialiter nostre camere coadherent, hoc adiecto pacto, quod sepefatum hospitale singulis annis in vigilia assumpcionis beate virginis tres libras cere de novo institutas et unam de antiquo camere nostre persolvere non obmittat, nec pretermittendum est, quin etiam nobis plenum ius patronatus ecclesie Bůzkilch totaliter observemus. Appossitum est etiam, si alicuius casu destructionis sepefatum hospitale ad nichilum devenerit, predicte possessiones singule ad nostrum monasterium libere et absolute sine contradictione qualibet revolventur. In cuius rei testimonium presens instrumentum predicti hospitalis sigilli est munimine roboratum. Acta sunt hec apud Rappresswile presentibus hiis testibus: domino . . dicto Hardegge⁶, domino R. plebano in Rappresswile, domino H. de Bůskilch sacerdote, domino V^oI. rectore ecclesie in Walde⁷, domino Alber. de Vrikon⁸ milite, domino C. dapifero, C. advocato dicto Cimicon⁹, Wern. de Rambach¹⁰, Johanne dicto Gamlenstein¹⁰, R. de Hasla¹¹, C. dicto Banwart, R. cellerario in Tuggen¹². Dat. anno domini M°C°C°LX°X°X°X°, in vigilia nativitatis beate virginis, indictione XII.

Source Fulltext: Chartularium Sangallense IV, Nr. 2246, S. 362.