In nomine domini amen. Quoniam quidem summe felicitatis bonum in ecclesia dei fore dinoscitur cum hiis, qui in religione || domino iugiter famulantur, ut in eadem persistere valeant, provide subvenitur, sic e diverso eiusdem boni se reddunt extorres, qui eosdem gravant || indebite ac perturbant. Huius igitur rationis intentione ego Ru^odolfus vir nobilis dictus de Stretelingin¹ habens in comitatu meo Lu^otol||dum de Bebingen sororium meum et L. filium eius² nobiles et Heinricum filium fratris mei H. nobilis de Stretelin.^a)3 una cum Joselmo milite strennuo et discreto veniens in Wettingin monasterium⁴ ordinis Cisterciensis Constantiensis diocesis, quod felicis recordationis vir nobilis frater H. dictus Wandilbere⁵ avunculus meus de novo fundavit sollempniter et construxit et suis rebus ac bonis mobilibus et immobilibus propriis liberaliter dotavit et nobiliter insignivit in remedium videlicet sue suorumque parentum omnium animarum. Quarum rerum sive bonorum cum ego et H. dictus frater meus et sorores nostre universaque proles ratione affinitatis⁶ deberemus esse heredes, quia prolem legitimam superstitem minime dereliquit, et si prefatum monasterium non fundasset, ubi isdem sepultus in domino requiescit, ne a nobis seu a successoribus nostris inpetantur indebite curavi prevenire et modis omnibus premunire. Igitur pro me et fratre meo Johanne⁷ ego renuntiavi et presenti scripto renuntio omni actioni, si qua nobis competebat in dictis bonis vel competere videbatur, necnon exceptioni consuetudini constitutioni legum privilegio fori litteris impetratis vel impetrandis et omnibus simul, per que vel quibus prefata resignatio seu renuntiatiatio^a) possit aliqualiter irritari. Similiter dicti nobiles fecerunt videlicet senior L. pro sorore mea Margareta⁸ nobile^a) femina, L. filius eorundem et H. fratruelis meus pro se ipsis renuntiarunt omnibus in manus venerabilis domini H. eiusdem monasterii abbatis⁹ et per omnia, sicut supra positum est, sicut ego. Quo facto dictus dominus abbas et conventus eterne pietatis^b) zenia videlicet fraternitatem et communionem omnium bonorum, que in eadem domo et in ordine eorum fiunt et donante domino fient decetero, contulerunt, unde et ego memoratus R. ratione fundationis ibidem meam habere proposui sepulturam. Acta sunt autem hec anno gratie M°.CC°.L°.VIII°. V°. kal. iunii, indictione prima, in monasterio Wettingin in auditorio superiori, quod est versus capellam infirmorum, presente domino abbate memorato et conventu eiusdem cenobii universo. In huius igitur renuntiationis firmitatem et evidentiam pleniorem presentem litteram scribi feci et mei sigilli munimine memoratis domino abbati et conventui contuli^c) communitam. Nos vero L. et H. nobiles¹⁰, quia nondum habemus sigilla propria, dilecti avunculi nostri et patrui nostri sigillo in presenti nos uti negotio profitemur.

Source Fulltext: Chartularium Sangallense III, Nr. 1590, S. 427-428.