In^a) nomine domini amen^b). Omnibus^a) Christi fidelibus presentem paginam inspecturis Berth. divina miseratione sancti Galli || abbas executor sive iudex a sede apostolica delegatus celestis vite dulcedinem promereri et noticiam subscriptorum. Recepto sedis apostolice mandato super provi||sione Burch. dicti de Hewen¹ canonici Constantiensis exequenda, cum idem B. ecclesiam in Kilberch Constantiensis dyocesis peteret a nobis ratione mandati predicti || tanquam vacantem assignari, nos vocatis, qui propter hoc fuerant evocandi, proxima VIta feria post Quasimodo geniti aput sanctum Gallum termino constituto et ibidem prefato B. dictam ecclesiam cum instantia petente, reverendus in Christo abbas de Scaphusa nomine sui monasterii proposuit coram nobis, quod cum predicta ecclesia in Kilchperch ex indulgentia sedis apostolice ad usus sui monasterii concessa pleno iure et per venerabilem patrem E. dei gratia Constantiensem episcopum de consensu capituli sui ipsa ecclesia vacante deputata in ipsius ecclesie possessione iuris et facti idem abbas et suum monasterium existeret, sepefatum B. canonicum super tali benefitio fore nullatenus audiendum, ostendendo nichilominus ex aliis causis pluribus, quod dictus B. ap(ut) suum monasterium occasione literarum nobis directarum a sede apostolica sibi provideri petere non poterat nec debebat. Nos igitur auditis et intellectis rationibus, allegationibus hinc inde propositis, visis etiam literis sive indulgentiis partis utriusque^c) ac instrumentis earundem occasione confectis et ipsorum tenore diligenter inspectis, quoniam nobis constitit evidenter, sepedicto abbati et monasterio Scaphusensi ex indulgentia sedis apostolice, accedente postmodum dicti domini episcopi et sui capituli consensu et auctoritate, ius in sepedicta ecclesia Kilchperch cum sua dependente Scafusa acquisitum de consilio prudentum virorum in nomine patris et filii et spiritus sancti sententiando pronuntiavimus, sepefatam ecclesiam in Kilchperch cum sua dependente Scaphusa ad predictum abbatem et suum monasterium pertinere et ad usus eorum cum omnibus suis appenditiis de cetera retinenda, nominato B. canonico super iam dicta ecclesia Kilperch et sua dependente perpetuum silentium imponentes, absolvendo penitus ab omni impeticione memorati canonici abbatem et monasterium antedictum. In cuius facti evidentiam hanc literam super actis et processu ac a nobis prolata sententia conceptam partibus concessimus sigilli nostri munimine communitam. Dat. ap(ut) sanctum Gallum, anno domini M°.CC°.L quarto, VI^ta. feria post Quasimodo geniti, quod est VIII°. kl. mai. indict. XII^a.

Source Fulltext: Chartularium Sangallense III, Nr. 1507, S. 377-378.