H. dei gratia Constantiensis episcopus¹ omnibus hanc paginam inspecturis noticiam geste rei. Cum in causa, que vertitur inter monasterium sancti Galli ex una parte et monasterium in Oberriet² ex altera super quibusdam possessionibus in Norsigin³ sitis utraque pars a sede Magunt(ina)⁴ iudices impetrasset, quorum quidam suas nobis sententias exequi mandaverunt, aliis contrarium nobis mandatum porrigentibus, nos in causa presenti iuris super hoc expressi doctrinam sequentes, ipsa nobis ad certum terminum autentica iussimus exhiberi, volentes ex inspectione eorundem necnon assertione partium plenius experiri, quibus iudicibus parere potius debeamus. Verum quia pars monasterii de Oberriet termino constituto nec venit nec suum nobis autenticum exhibere curavit, parte altera cum suis instrumentis, ut debuit, comparente, nos prudentum usi consilio interlocuti sumus, ut, quia culpa suos tenere debet auctores, nos eorum iudicum, quorum nobis ostensum non fuit autenticum, sententias aliquas exequi de iure non teneri, et quia pena non est ulterius extendenda, quam delictum fuerit in excedente repertum, sententias iudicum illorum, qui suum nobis iusserunt exhiberi mandatum, omnimodum exequi oportere, quousque contrarium debere fieri non docetur. Dat. Constantie, anno domini M°.CC°.XL°.III°. non. iunii.

Source Fulltext: Chartularium Sangallense III, Nr. 1325, S. 262-263.