Ich Ru^edolf von Toczenpach vergich an disem prief, daz ich vnd ellev meinev chind, di ich vnd vrow Peters mein hovsvrow hern Otten to^echter von Jesentz miteinander haben gehabt, paidev man vnd vrowen, di also genant sind Haertneit, Ott, Philipp, Agnes vnd Katrey, dem gotshous dacz Povmgartenperg haben gegeben allez vnser recht, daz wier haben gehabt an dem gut an dem Jacobsperg in sand Lienharth pharr in dem vo^erst versu^echt vnd vnuersu^echt zv^e einem selgeraet also beschaidenleichen, daz di Samnvng dacz Povmgartenperg der vorgenanten vrowen Petersen meiner hovsvrowen Jartag begen schol, als sit vnd gewonhait ist in gro^ebem orden. vnd daz dis gab staet vnd vnzeprochen fv^erbaz von mier vnd von allen meinen erben beleib, dar vmb gib ich Rvdolf von To^etzenpach disen versiglt prief mit meinem hangunden insigel dem go^etshovs ze Povmgartenperg zv^e einem v^erchund vnd zv^e einer bestaetigvnge diser sach. dez sind gezevg her Meinhart von Raevt, Hainreich sein svn, Pillvnch von schorring, Gotfrit der Waser, Herlieb von Pu^erchstal, Ott von To^etzenpach vnd dar zve manich pideber man paidev reiter vnd chnecht. Daz ist geschehen, do von Christs gepv^erd ergangen warn drevczehen hundert Jar vnd darnach in dem Zweliften iar an sand Agnesen tag.

Source Fulltext: OÖUB 5 (Wien 1868) S. 67-68, Nr. 65