In nomine sanctae et individuae trinitatis. Liupoldus dei gratia dux Austriae et Styriae. Quoniam ad iudiciariae potestatis sollicitudinem pertinere dinoscitur eis, quae ad iustitiae et rectitudinis obseruationem inducunt, diligentiam impendere, et indebitos questus, quae se occasione iuris negotiis immergere solent, repellere, nos, hanc ipsam cautellam iudiciis nostris adhibere cupientes, uiolentias et grauamina exactionum praecidere et exstirpare intendimus. Quapropter iustis ac statutis nostris debitis contenti esse uolentes iustitiam illam de Ardakker, quam ecclesia illa et confratres eius in foro et nundinis eiusdem suburbii, hoc est in festo sanctae Margaretae, prius habuisse sed postea insolentia preconum et exactorum immutatam et agrauatam esse comperti sumus, petitione dilecti nobis praepositi Chonradi, Salichint dicti, remisimus et renouauimus ita uidelicet, ut recepto a nostris dispensatoribus et officialibus uno talento nichil ultra exigatur, sed cetera in usus praepositi et fratrum praefati loci cedant. Omnem etiam uiolentiam et iniuriam de hoc ipso recognito eis iure inhibemus et iussionis nostrae mandato prorsus amovemus. Ne ergo de cetero super his ulla oriatur ambiguitas ob firmam diffinitae rei cognitionem et perpetuam memoriam retinendam, statuimus et auctoritate scripti nostri confirmantes praecipimus, ut hoc ipsum statutum nostrum nullius unquam praesumptione uioletur. In hujus etiam rei argumentum praesentem paginam conscribi et sigilli nostri impressione roborari iussimus annotatis etiam testibus, qui huic nostrae ordinationi interfuerunt. Dietricus Halgravius. Hadmarus de Chünringen. Welvingus de Chaphenberch. Herrandus de Wildonia. Erchengerus de Landesere et frater ejus Rvdolfus. Vlricus de Stubenberch. Otto de Volchenstorf et alii quam plures.

Source Fulltext: FRIESS, Ardagger (AÖG 46, 1871) S. 471