Wir Fridreich von gotes genaden, Roemischer Kunig zu allen zeiten Merêr des Reichs, hertzog zu Osterreich, zu Steir, zu Kernden, und zu Krain, Grave zu Tirol etc. Bekennen fur uns, und unser erben, daz wir angesehen haben, die fleissigen dienst, so uns unser getrewr lieber, Walther Czebinger unser Rate untzher unverdrossenlich getan hat, und hinfur tuen sol und mag. Und haben Im dadurch und von sundern genaden, unser haus hie zu Wienn bey der Burkg am Ekg zenagst, Ulreichs Fochter haus gelegen, das vormals unsers getrewn, Jacobs Kaschawer gewesen und von unserm getrewn, Wernharten Fuchsperger in kaufweis an uns chomen ist, lediclich gegeben, und geben auch wissentlich mit dem brieve was wir Im zu recht daran geben sullen oder mugen. In solher mass, daz er und sein erben, dasselb haws mit seiner zugehoerung, nu furbazzer innhaben nutzen und niessen und allen iren frummen damit schaffen sullen und muegen, mit verkauffen, versetzen, geben, schaffen oder machen, wem Sy wellen, als mit annderm irem aigem guet, an unser, unserer erben, und mêniclichs irrung und hindernuß. Mit urkund ditzs briefs. Geben zu Wienn an Mittichen vor sannd Michels tag Nach cristi geburde im viertzehenhundert und Syben-undviertzigisten Jar . Unsers Reichs im achtten iare. Commissio domini Regis propria.

Source Fulltext: Peter Peusquens