Wir Fridreich von gots gnaden, Roemischer kuenig, zu allen zeiten merêr des Reichs, Hertzog ze Oesterreich, ze Steir, ze Kêrnden, und ze Krain, Grave ze Tirol etc. Bekennen, von der zwayung wegen, die sind zwischen dem Erwirdigen Leonarten Bischoven zu Passaw unserm fuersten Rat und lieben andêchtigen ains und den Erbern weisen unsern lieben getrewn..unsern burgern hie zu wienn des andern tails, von ains Gartten daselbs ze wienn vor werdertor gelegen und andrer Stukch wegen, darumb wir In vormals zubaiderseitt ainen tag fur uns auf den phintztag nach dem Suntag Trinitatis nagstvergangen beschaiden, und die aber mit baider tail willen und wissen, auf sand Jacobs tag auch nachstvergangen geschoben hetten, nach Innhalt der ladung und schubbrief darumb ausgangen. Daz wir dieselben sachen, von mercklicher unsrer geschêfft und unmuse wegen, damit wir yetz beladen sein verrer geschoben haben wissentleich mit dem brief, bis auf den nachsten Montag nach sand Mertteins tag schiristkuenftigen yetwederm tail an seinen Rechten unentgolten, Insolhermass, ob baid tail in der zeit nicht guetleich veraint wuerden, daz dann Sy, oder Ir Anwêlt auf denselben Montag widerumb fuer uns koemen, so wellen wir Si darumb mit Recht entschaiden In allermass, als auf den obgenanten Sannd Jacobs tag, beschechen solt sein. Mit urkund des briefs. Geben zu Wienn an sand Matheus abend des heiligen zwelspoten und Ewangelisten. Anno domini etc. quadragesimo septimo, Unsers Reichs im Achten jar. Commissio domini Regis in consilio.

Source Fulltext: Peter Peusquens