Wir Fridreich von gots gnaden, Roemischer kuenig, zu allentzeiten merêr des Reichs, Hertzog ze Oesterreich, ze Steir, ze Kernden, und ze Krain, Graf ze Tirol etc. Bekennen, von der zwayung wegen, die sind zwischen dem Erwirdigen Leonarten Bischoven zu Passaw, unserm fursten Rat, und lieben andêchtigen ains tails, und den Erbern weisen unsern lieben getrewn, unsern Burgern zu Wienn, des andern, von ains Garten daselbs ze Wienn, vor Werdertor gelegen, und anderer stuekch wegen, nach lautt der ladung von uns darumb ausgegangen, darumb wir In zubaiderseit heten ainen tag, fur uns beschaiden, auf den Phintztag nach dem Suntag Trinitatis nagstvergan-gen, da aber wir auf denselben tag nicht sein ze Wienn gewesen, haben wir die sachen zwischen In, mit beder tail wissen und willen, geschoben wissentlich mit dem brief, untz auf sand Jacobs tag schiristkunftigen, unentgolten, yedem tail an seinen Rechten Insolhermass, daz dann bed vorgenante tail, oder Ir anwêlt auf denselben sand Jacobs tag fuer uns koemen. So wellen wir die sachen zwischen In verhoeren, und versuhen die guetlich zuverainen, und zuentschaiden, In aller mass, als das auf den obgenanten Phintztag solt beschehen sein. Mit urkund der briefs. Geben an Eritag vor sand Johanns tag zu Sunnewenden anno domini etc. Quadragesimo septimo, unsers Reichs im achten jare. Commissio domini Regis, l(itte)rat(orie) facta.

Source Fulltext: Peter Peusquens