Den ersamen weisen..dem Burgermaister und dem Rat der Stat zu Wienn und den verwesern Irer Stat Gruntpueher daselbs, meinen lieben herren. Embeut ich Hanns Huett pfarrer zu Stainen-kirchen, dietzeit Caplan der ewigen meß, auf allerheiligen altar datz sand Steffan zu Wienn der von Tirna lehenschafft. Mein willig dinst Ich lasse ewr Ersamkait wissen, das ich ain haws, so zu der vorgenanten meß gehoert hat, gelegen daselbs zu Wienn auf der Moering zenagst Ulreichs des Kêrner haws an aim tail, und an dem andern zenagst Thomans Ekkenperger haws. Dem erbern Chuontzen Reiff ewerm mitburger und seinen erben zuchauffen geben hab nach lautt ains kauff-briefs den man ew hiemit fuerbringt. Bitt ich ewr weishait mit allem fleisse Ir welt denselben kaufbrief mit ewerm GruntInsigil besigiln auch das vorgenant haws dem egenanten..Reiffen und seinen erben vertigen, und sew darumb in ewr gruntbuch schaffen zuschreiben. Das wil ich umb ew gern verdienn. Mit urkund des briefs besigilt mit meim aufgedruktem Insigil Des ist zeug durch meiner pet willen, der Ersam maister Mertt Guldein lerer in der Ertzney mit seim aufgedruktem Insigil, Im und seinen erben an schaden. Geben an freitag vor Letare ze Mittervasten. Anno domini etc. Quadragesimo septimo.

Source Fulltext: Peter Peusquens