Ich Elspeth Ulreichs des Lehner zu Vilspiburg tochtter und Wolfgangs Laêr des kuersner zu Wienn hausfrau Bekenn fur mich und mein erben offenntlich mit dem brief das mir die erbern weisen Andre Gundorffer dietzeit des Rats der Stat zu Wienn und Niclas Purger burger daselbs paid verweser der Stat gruntpueher Ingeantwuortt und gegeben habend Sechtzig pfund wienner phening die zu meinn handen pey demselben Gruntpuoch gelegen sein und mir zu meim erbtail zuogebuerent von des Hawss wegen Gegen dem Brobsthof ueber gelegen, das weilent Maister Erasems des Puochartzts meins vettern seligen gewesen ist das der obgenant mein vater anstat mein und meiner muoter und Wernhart mein pruoder und mein Swager Michelen dem Weissen verchaufft habend Davon sag ich fur mich und all mein erben die vorgenanten verweser der Stat gruntpuecher Ir erben und nachkomen der benanten Sechtzig pfund phening quitt ledig und los und sullen auch ich und mein erben noch ander yemants von unsern wegen hinfuer von des ver-kauffens und vertigung wegen des obgenanten hawss zu In noch zu yemand andern kainerlai zuspruch noch vordrung haben weder mit Recht noch an Recht in kainerlay weise an alles gevêr Mit urkund des briefs besigilt mit der erbern Joergen des Haugen und Niclasen des Renharts paid burger ze wienn aufgedrukten Insigiln die Ich darumb mit fleisse gepeten hab In und Iren erben an schaden darunder Ich mich und mein erben verpind stêtzuhalten und Bekenn alles des so vor-geschriben stet. Geben zu Wienn an Mittichen nach sand Ulreichs tag. Anno domini etc. Quadragesimo sexto

Source Fulltext: Peter Peusquens