Ich Barbara, Albrechten dez Reschen weylant mitburger zu wyenn seligen witib Bechenn offenn-lich mit dem brief fur mich und all mein erben, das Ich mit guetem willen bedechtlich und unbetwungenlich zu der zeit do ich das mit recht wol getuen mocht Recht und Redlich auch lautterleich auf geben hab Gib auch auf wissentlich in kraft des briefs meinen lieben pruedern Hannsen Goltscher und Leonharten Ledrer, Meinen tail hauws gelegen zu Wyenn vor Stubentor im Grewt zenachst des Ofner Munser hawsung an ainem tail und am andern tail zenacht dez Wech-torn Munser hawsung Als das die benanten mein geprueder den selben mein erbtail haws vor-genant furbaser sullen und mugenn verrer dem Erbern Leonhart Stengel ledrer auch mitburger zu wienn der das haws dann kauft hat Im daz freyen in Nutz und Gewer setzen und in daz Gruntpuch zu wyenn lassen schreiben mit ambtmans hannden Als der Stat Recht ist daselbs zw wyenn An mein und meiner erben hinfur menichleichs Inred und widersprechen treulich und ungeverlich Mit urkund den briefs Besigelt Mit der Ersamen weysen Caspar Ventur und Peter Jungerlen paid purger des Rats paider furgedrugkter Insigel Das Sy durch meiner fleissiger gepet willen ze gezeugnuss der sachen an den brief gedrukt haben In und Irn erben an schaden. Geben zu Prespurg An Mitichen sand Peters und Pauls tag Anno domini etc. XLmo sexto.

Source Fulltext: Peter Peusquens