Unser frewntlich dinst bevor Ersamen weisen, Uns hat an pracht Ulreich Smid unser mitburger wie er ettlich sein wein seins paws, die Im gewachssen sind auf dem Taewtschen, hab wellen furn an die Tunaw nach dem und er si verkauft hat, des Ir Im nicht habt wollen gestatten als er uns hat furpracht, und wir doch das pillich getuen muegen, des aber der unser zu schaden sey komen das uns fremd und unpillich bedunkcht. Darauf ist unsers begern Ir wellet dem unsern sein schaden widerkern und uns hin fur an schaden halten und mit unserm wein, und mit annderm unserm guet ungeirret lassen, wenn Ir wol verstet das Ir das pillich tuet Ewere verschribne anttwurtt last uns wissen. Geben zu der Newnstat an sand Urbans tag Anno domini etc. Quadragesimosexto Burgermaister, Richtter und Rate Der Stat zue der Newnstat.

Source Fulltext: Peter Peusquens