Fridreich von gots gnaden, Roemischer Kunig zu allenzeiten Merer des Reichs, Hertzog ze Oesterreich, und ze Steir etc. Erbern weisen und lieben getrewn. Wir haben dem Edeln, Ersamen gelehrten unserm andêchtigen, und lieben getrewn Kasparn Herren zur weissenkirchen unserm kammerer, Maister Hannsen von Mewrs pharrer zu Gors, und Hannsen von Neitperg, unsern Rêten, bevolhen, ettwas unser und des lannds merkleicher notduerft von unsern wegen an ew ze bringen. Begern wir mit sunderm fleiss, Ir wellet In darInn ditsmals gênntzleich gelauben und ew darzu fuerderleich und willig beweisen, als Ir dann versteen muegt, das des ditsmals ye ain notdurft ist. Das wellen wir gen ew auch gnêdigkleich erkennen. Geben zu der Newnstat, an Mittichen, nach sand Joergen tag, anno domini etc. quadragesimo sexto, unsers Reichs im sibenden jare.

Source Fulltext: Peter Peusquens