Namhafften fursichtigen wolweisen und lieben herrn, unser dinst mit guetem willen voran berait. Uns hat furpracht Thoman Kauffman unser mitpurger, wie man jm ettlich vass mit traid und mel von Wienn her zu der Stat nicht fuern welle lassen,Soelh aufhalden uns auch von andern unsern mitpurgern furkoemen sind, und wann ewr weishait zu gueter mass wol wais, das hie umb kainer-lay traid worden, und auch alle Strassen von den veinten verlegt und verhindert sein das uns kainerlay notdurfft und Narung, weder von Ungern, von Peheim, und von Mêrhern herzu gefuert wirdet alsvor. Davon, So bitten wir ewr fursichtikait mit allem vleyss ir wellet dem egenanten Thoman und andern unsern mitpurgern solh notdurfft und Speisung der Stat verguennen und urlauben herab zefuern, wann ir uns sunder grasse furdrung daran beweiset, das uns umb ewr weishait mit vleyss stet zuverdienn. Geben zu Haimburg an Montag nach dem Suntag Quasimodo geniti Anno domini etc. XLV°. Richter und Rate der Stat zu Haimburg

Source Fulltext: Peter Peusquens