Wir Fridreich von gotes gnaden Roemischer kuenig zu allen zeiten Mêrer des Reichs, Hertzog ze Oesterreich ze Steir ze Kêrnden und ze Krain, Grave ze Tirol etc. Bekennen Daz fuer uns komen ist unser getrewr Hanns Wuerffl und hat uns diemuetiklich gepeten, daz wir Im die halb vesten Radawn mit Irer zugehoerung, die weilent Joerg Stainrewtter und Anna sein hawsfraw inngehabt haben gnêdigclich geruchten zu verleihen wann die von demselben Stamrewtter, und seiner haws-frawn, in gemêchtsweys, an In komen und gevallen wêr, und von uns, und unserm fuerstentumb Oesterreich zu lehen ruerte. Das haben wir getan, und haben dem obgenanten Hannsen Wuerffl dieselb halb vesten Radawn mit aller Irer zugehoerung, als dann die der obgemelt weylent Joerg Stamrewtter, und sein hawsfraw, inngehabt, genuetzt und genossen zu seinen Rechten verlihen, und leihen auch wissentlich mit dem brief, was wir Im zu Recht daran verleihen suellen oder muegen. Also daz Er und sein Erben, die nu furbazzer von uns, unserm lieben vettern, kuenig Lasslawen, des vormund wir sein, und seinen Erben in lehensweys Innhaben, Nuetzen und niessen suellen und muegen, als lehens und lannds Recht ist, ungeverlich. Mit urkund des briefs. Geben zu Wienn an Sambstag vor Sannd Pauls tag der bekerung. Nach kristi gepurde im viertzehenhunderis-ten und darnach in dem fuenfundvierzigisten Jare. Unsers Reichs im fuenfften Jar Commissio domini Regis in consilio.

Source Fulltext: Peter Peusquens