Fridreich von gots gnaden Roemischer kunig, zu allenzeiten Merêr des Reichs . Hertzog zu Osterreich und zu Steir etc. Erbern weisen, und lieben getrewen. Von des Lempertzagel und des Aspachs wegen, die bey ew gefanngen ligen, und die unser lieber getrewer, Erhart von Czelking unser Rate zu vêncknuß pracht hat, lassen wir ew wissen, daz uns die Hochgeborn Kathrei Hertzogin zu Oesterreich etc. unser liebe Swester gepeten hat dieselben Lempertzagl und Aspach soelher Irer vêncknuß ledig ze schaffen Nu schreiben wir dem yetzgenanten von Czelking und pitten In, die benanten Lempert-zagl, und Aspach, soelher Intzicht darumb er Sy zu vêncknuß bracht hat, umb unsern willen zube-geben, und daz Gemain urfecht von In genomen, und Sy darauf furderlich ledig gelassen wuerden. Davon so emphelhen wir ew ernstleich und wellen, daz Ir die obgenanten Lempertzagl und Aspach verrer haltet, und kain recht wider Si ergeen lasset, untz daz wir von dem obgenanten von Zelking ain anttwort haben, und wir ew darauf verrer unser maynung zuschreiben und verkun-den. Daran tuet Ir unser ernstliche maynung. Geben zu der Newenstat an freitag vor Sannd Lucein tag. Anno domini etc. XLIIII°. Unsers Reichs im funifften Jar. Commissio domini Regis in consilio.

Source Fulltext: Peter Peusquens