Wir der Richter und Rate der Stat zu Prespurg Bekennen offennlich mit dem brief Das fur uns ist kommen der Erber Philipp Kugersauf, Burger und bey uns der Stat kamrer, und hat mit guetem willen bedaechtlich zue den zeiten, da er das wol getuen mocht seinen ganntzen gewalt gegeben hat Gibt auch wissenntlich in kraft des briefs Anna seiner eleichen hausfrawn weyserinn des briefs von ettlicher aussteunder geltschuld wegen So in der Erberer Hanns vom Graben Burger zu Wyenn schuldig ist von ains hawss wegen, also das dieselb sein hausfraw Anna Sol und mag dy selb Gelt-schuld an irs manns stat ervordern inbringen innemen mit minn oder mit dem rechten, Denselben Hanns vom Graben auch dez Satz seins hawss das dem benanten Philipp stet umb dy Geltschuld mag frey und ledig sagen vor dem Satzbuch oder wo sein notturft wirt, an seiner stat, und in den sachen allen tuen und hanndeln zegewin und verlust ze gleicher weis, als unser benanter mit-burger selbs da engegen wer, das ist alles sein will und wort angever. Mit urkund dez briefs Besigelt mit unserm der Stat mynneren furgedrukten Statsigel. Doch der Stat und uns an schaden. Geben zu Prespurg an Mantag vor sannd Gilgen tag anno etc. XLIIIIto

Source Fulltext: Peter Peusquens