Ersamen weisen, lieben herren und frewndt. Unser willig dienst zevoer. Uns hat der gegen-wuerttig unser mitburger Thaman Rechperger der stainmetz anstat Christein seiner hausfrawn, anbracht. Wie, daz weilent, Ulreichs Pewglpekchen, wittib, die nachmaln Ruoprechten Pewgl-pekchen, ewern mitburger, auch elich gehabt hat, under anderm yerem geschêft, so Sy, an Iren lesten zeiten, hat getan, das versehenlich in ewrm Statpuoch geschriben stet. Der bemelten seiner hausfrawn Christein als des egenanten Irs ereren Manns seligen Bruoder tôchter geschaft hab, funf phunt phening, die er gern also zu yeren hannden einbringen wolt. Lassen wir Eur weishait wissen, das derselb unser mitburger Thaman Rechperger, die benante Christein sein hausfrawn, hie elich mit dem briester hat genomen und ein guets chêndel leben mit Ir fueret, und Bitten ew mit vleis, Im von unsern wegen hilflich, und darob ze sein, damit er der benanten funf phunt phening, von dem vorgedachten Ruoprechten ewrem mitburger, als von seins weibs seligen Geschêfftman, an lenger verziehen, entricht werde. Das wellen wir, in desgleichen und merern sachen umb ewr lieb und frewntschaft gern verdienen. Geben ze Grêtz des Erichtags nach sand Margreten tag. Anno domini etc. Quadragesimo quarto. Burgermaister Richter und Rat, der Stat Grêtz

Source Fulltext: Peter Peusquens