Wir Fridreich von gotes gnaden, Roemischer kuenig, zu allen zeiten, Merer des Reichs, Hertzog ze Oesterreich ze Steir ze Kernden und ze Krain Graf ze Tyrol etc. Embieten dem Erbern unserm andêchtigen, Mertten, der von Tirna kapelln in sand Stephans kirchen ze Wienn, Caplan, unser gnad und alles guet. Wir lassen dich wissen, daz wir der Erbern Barbaren Niclasen des Rauscher von Brunn hausfrawn, ainn weingarten, gelegen in dem hart, des drew virtail sind, der weilent Albrechts des Ritzel, unsers weyermaister zu wienn gewesen ist, von solcher geltschuld wegen, so derselb Albrecht hinder Im lassen hat, ze kauffen geben haben, und wan du des egenanten weingarten Gruntherr pist, als wir vernemen, und der brief, so der egenant Albrecht daruber gehabt und hinder Im lassen hat, nach seinem abgang emphromdet und verlorn sind worden, dadurch wir wellen und setzen, ob dieselben brief nu fuerbazzer ynndert herfuer kêmen und furbracht wuerden, daz die dann tod kraflos, und gantz vernicht sein sullen, in allen wegen ungeverleich. Und emphelhen dir darauf, und wellen ernstlich, daz du die egenanten Barbaren desselben weingarten mit seiner zuegehorungen in dem Gruntpuoch,nutz und gwer schreibest, als gewondlich ist, doch unvergriffen der dinst und Czins, so man von alter her von demselben wein-garten phlichtig ist zegeben. Daran begeest du gêntzleich unser maynung. Geben an freytag, vor sannd Giligen tag, Anno domini etc. XLIII°, unsers Reichs im virden jar. commissio domini regis per cons(ilium).

Source Fulltext: Peter Peusquens