Ich Johan von Pomersheim Landcomenteur, deawtsches ordens in Oesterreich und verweser des deawtschen hawss zu Wienne, und wir der Convent gemain daselbs. Bekennen daz uns, der erber Jorgen Zwetler der Eysenzieher, bei der Statgruntbuch hie zu Wienne, ausgeraicht und gegeben hat, achtzehen phunt phening, die bey demselben gruntpuoch gelegen sein, fuer achtzehen schil-ling phening geltz purkrechts, so wir auf seinem haus, daz ettwenn des Stainbanter gewesen ist, hinder sant Pangrêtzen, zenagst Hansen Hiltprants haws gelegen, gehabt haben, davon sagen wir fuer uns und all unser nachkomen, die erbern weisen Oswalten Reicholf diezeit des Rats der Stat zu Wienn, und Arnolten Galander Burger daselbs diezeit verweser des egemelten gruntbuechs, und ire nachkomen, auch den vorgenanten Zwetler und sein erben der obgenanten achtzehen phunt phening gêntzlich quit ledig und los, vor aller ansprach und vadrung ungeverlich. Mit urchunt des briefs, besigilt mit unser obgenanten Johan von Pomersheim Landcomentewr und des egenanten dêwtschenhauss zu Wienn aufgedrukten Insigiln. Geben zu Wienn an Sambtztag vor sant Maria Magdalen tag, Anno domini M°CCCC° quadragesimo tercio.

Source Fulltext: Peter Peusquens