DEn Ersamen hochweisen herren, dem Burgermaister, und dem Rat der Stat zu Wienn, und den verwesern ires Gruntbuchs, meinen lieben herren. Embewt Ich Wernhart Perger, mein willig undertênig dinst. Ich lass Ewr ersamkait wissen, daz Ich mein haus in der kernerstrass zu wienn gelegen gegen sand Johanns ueber Dem erbern Hannsen dem Luchsen ewerm miburger, umb drithalbhundert phund phening zukauffen geben hab, nach laut ains kauf briefs, den Ew mein Sweher, Ortolf Krukchenperger hiemit fuerbringt. Bit ich ewr Ersamkeit diemuetigclich mit fleiss, Ir wellet denselben kauffbrief mit ewerm gruntInsigl vertigen und besigln. Auch den vorgenanten Luchsen, und sein erben, Nutz und gewer in ewer Gruntbuoch umb das egemelt haus, und mich daraus schreiben lassen. Das ist mein gueter will, wann ich ew hiemit aufsenndt, all mein gerech-tigkait, so ich an dem egenanten haus gehabt hab, Mit urchund des briefs besiglten mit der erbern weisen, Sebastians des fleischman, dietzeit des Rats zu Berchtoltzdorf, und Hannsen des Pawrn burger daselbs Aufgedrukchten Insigln, die ich zugetzewgnuenss der sach mit fleiß darumb gepe-ten hab, In und Iren erben an schaden. Darunder ich mich mit meinen trewn verpind, Stêtzuhalten das an dem brief geschriben stet. Der geben ist zu Berchtoltzdorf an sannd Margrethen Abend. Anno domini etc. Quadragesimo tercio.

Source Fulltext: Peter Peusquens