Elizabeth von gots gnaden Kuniginn zu Ungern Dalmatien Croatien etc. Erbling zu Behem Hertzogin zu Osterreich zu Steir und Margrafinn zu Merhern etc. Sunderlieben getrewen. Wir haben euch am nagsten, von suelher Cleynott wegen die der Czetzko zum ainem wechsler bey euch versetzt hatt, geschriben, nu vernamen wir daz der tag der betzalunge und die pfannt auß zuloessen vergangen sey, dorumb pitten wir euch noch begernde mitt sunderm vleyße, Ir wellet trewlichen doran seyn, und mitt wem das nott ist bestellen, daz die Cleynott noch drey oder vier wochen unverrichtt ynnegehalten, und nitt fuder verkauft oder verkummert werden wannen uns dovon nicht klainer schade entsteen muechte, dannen wellen wir ye gedencken daz sie geloesett, und der, dem sie versetzet seyn zu dancke betzalet werden suelle, und tuet dorynnen ewern pesten fleyß alz wir euch wol vertrawen, doran verzeiget Ir uns ain sunder wolgefallen, des wir ouch in allem gen euch gedencken wullen. Geben zu Prespurgk am sampstage vor de Suntage Misericordia domini Anno etc. XLII°.

Source Fulltext: Peter Peusquens