Fuersichtigen Erbern und weys besunderlieben und gut frewnt Unser frewntlich willig dienst zuvor. Uns hat unser Ratgenoß Merten Aunpeck in unserm Rat fuerbracht, wie daz er fuenf Saum Sueßweins, nach seiner notturft hinab in daz lannt gein Oesterreich gefurtt, und auf dieselben wein, zu Lynntz das gelaitte, nach alter gewonhait, genomen und außgericht hab, und als die wein, gein KornNewnburg koemen sein, hab sich der hubmeister, derselben wein auf eur anbrin-gen underwinden, und gein Wienn fuern lassen, und unnder In, und ew, getailt worden, daz uns doch nach altem herchoemen soelher aribait, die der vorgenant, und annder, unser Mitburger, bißher ungeirrt gehanndelt haben. Sunder nach dem und wir umb unser gewerbe, von dem hause zu Oesterreich genedigklich gefreyt sein, nicht pillich bedunckt. Darauf Bitten wir eur weißhait, mit allem vleisse, ir wellet daran sein, damit unserm vorgenanten Ratgenossen, soelich sein gut widerchert werde, damit wir, und er, das nicht ferrer, an unsern genedigisten hern, den Roemi-schen kuenig etc., und an die ennde, da wir daz pillichen tuen suellen, zebringen beduerffen, das uns das in solicher freyheitten, so wir in egenanter masse haben, beschehen waer, und getrawen ew wol, ir lasst es dartzu nicht koemen. Das wellen wir, mit allem willen gerne umb ew verdie-nen. Eur verschribene antwurt, last uns widerumb wissen. Geben an Eritag nach Pangrati Anno etc. XLImo Burgermeister Richter und Rate, der Stat zu Passawen

Source Fulltext: Peter Peusquens