Ich Wolfgang Grabmer gesessen zu Ottakrin Vergich offennlich mit dem brief fuer mich und all mein erben, das ich ingenomen und emphangen hab von den Erbern weisen Hainreichen dem Haiden, dietzeit ainer des Rats der Stat zu Wienn und Dietreichen dem Starchant, burger daselbs baid verweser der Stat Gruntpuecher, Sechsunddreissig phunt wienner phenning, die mich von Casparen Lienharts des Grabmer seligen sun, der ungevogter gestorben ist Als sein nagsten frewnt und Erb, angeeribt und bey der egenanten Stat Gruntpuech gelegen und herchomen sind von des egenanten meins prueders seligen haus in der Schenkchenstrass gelegen das derselb mein prueder seliger bey seinen lebtêgen Ulreichen dem Langenpekchen verchaufft hat und darumb sag Ich fuer mich und alle mein erben die obgenanten verweser des Gruntpuechs und Ir nachkomenn der benanten Summ phenning gêntzlich quitt ledig und los und ob In oder der Stat darumb icht krieg oder ansprach auferstuenden von wem das wêr oder wie sich das fuegt, was Sy des schaden nement, das sullen wir In alles ausrichten an allen Iren schaden und sullen Sy das haben zu mir und meinen erben unverschaidenlich und auf allem unserm guet, das wir Allenthalben haben wie das genant ist nichts ausgenomen wir sein lemtig oder tod Mit urchund des briefs besiglten Mit der Erbern Lienharten des Newnhover burger zu Wienn, und Hannsen des Ravenspurger, mitpurger daselbs aufgedrukchten insigeln die ich zu getzeugnuess mit vleiss darumb gepeten hab In und Iren erben an schaden Dorunder ich mich mit meinen trewen verpind stetzuhaben das vor ge-schriben stet Geben zu Wienn an freytag nach unserer lieben frawn tag Als Sy geporen ist Nach christi gepuerd virtzehenhundert jar darnach in dem Sibenunddreissigistem jare.

Source Fulltext: Peter Peusquens