Sigmund von gots genaden Romischer keyser zuallen ziten merer des Richs und zu Hungern zu Behem etc. kunig Lieben getreuen, uns hat zu erkennen geben, unser und des Richs liber getreuer, und diener Niclas Grunenwalt, wie das Ir Im ettlich zeime und ander gerett, das er uns und unserm hoff-gesind zu noturfft hat zu furen wollen, als wir Im dann sulchs vormals empfolhen, und dorumb zu unserm diener uffgenomen haben, in euer Stat habt verkummert, und uffgehalden, das wir nicht gern sehen, nach dem wir und unser hoffdiener, sulchs geretes nit emberen mogen. Begeren wir von euch, ernstlich gebitende, das Ir dem benanten Niclasen unsern diener, zustimd nach ange-sicht ditz briffs, sulch vorgenant sein gerett, lediget, und frey widerschaffet, und In das in unsern keyserlichen hoff an alle losung und maut furen lasset, do mit wir und die unsern nicht gesaumet werden, das ist uns von euch sunderlich wol zu danck, und getrauen euch wol Ir werdet das also tun. Geben zu Prespurg am Suntag nach Conceptionis unser Rich des Hungerischen etc. im XLVIII des Romischen im XXV des Behemischen im XV und des kaisertums im andern jaren. Ad mandatum domini Imperatoris Petrus Kalde etc.

Source Fulltext: Peter Peusquens