Wir Albrecht von gotes gnaden Hertzog ze Österreich ze Steir ze Kêrnden und ze Krain Markgraf ze Mêrhern und Grave zu Tirol etc. Embieten den erbern weisen unsern lieben getrewn ..dem Burgermaister..dem Richter und dem Rat zu wienn unser gnad und alles guot. Als ew wissentleich ist, von des anlehens wegen, das uns unser Burger daselbs ze Wienn, durch der merklichen ge-schêft willen, die wir von der ungelaubigen veind wegen vor handen haben tuen sullen, vernemen wir, wie ettleich under In, in demselben anlehen sawmig sein, und ir antzal, die auf Si gelegt ist, nicht haben ausgericht, daz uns von In vast missvelt. Davon emphelhen wir ew und wellen gar ernstleich, daz Ir von unsern wegen mit In schaffet, und ob Si des wider wêrn dartzue haltet, daz Ir yetweder sein antzal, die auf In gelegt ist, noch unvertzogenleich geb und ausrichtt zu unsern hannden, damit uns dasselb anlehen fuerderleich und gêntzleich inbracht und ausgerichtt werde. Auch ver-nemen wir, wie noch ettleich unserr Burger aussteen, auf die in demselben anlehen nichts sey gelegt worden, die es doch wol vermuegen zegeben. Nu ist unser mainung und em-phelhen ew ernstleich, daz Ir auf Ir yetwedern, ein antzal phenning slahet nach seinen staten, damit derselb Anslag des anlehens geleich gemacht, und chainer fuer den andern uebergriffen werde. Daran begeet Ir unser ernstleiche maynung. Geben zu Wienn an Eritag nach sand Pauls tag Conversionis Anno etc. vicesimo octavo. dominus dux in consilio

Source Fulltext: Peter Peusquens