Wir Hanns Scharffenperger Burgermaister Niclas underm Himel StatRichter und..der Rate gemain der Stat ze wienn. Bekennen fuer uns und unser nachkoemen und tuen kund offenleich mit dem brief Daz wir unverschaidenleich gelten suellen, dem edeln vesten Ritter hern Albrechten von Sweinwart, und seinen erben, Tausent Sechs hundert und Syben und Sechtzig guter ungerischer guldein, gerecht in gold und wag, die er uns zu unsern notduerfften berait gelihen hat, Der wir Si oder wer uns an Irer stat mit dem brief mont unverzogenleich ausrichten und betzaln suellen an Sand Mertten tag schieristkuenftig Tuen wir des nicht, was Si denn des benanten gelts, furbasser schaden nement, wie der schad genant wirdet, den Si ungesworn gesprechen muegen, denselben schaden zusambt dem vorgenanten hauptgut sullen und wellen wir In, allen ausrichten und wider-kern, das geloben wir In stêt zehaben, und zevolfuern mit unsern trewn angevêr Si suellen auch haubtgut und schaden haben datz uns und unsern nachkomen unverschaidenleich und dartzu auf allem dem guet So zu der egenanten Stat ze wienn gehoeret Und darueber zu ainem warn urkund, geben wir In den brief besigelten mit unserr vorgenanten Stat ze wienn klainem anhangundem Insigel Geben ze wienn an Eritag nach Mathei Nach Kristi gepurd viertzehenhundert Jar darnach in dem Sechsundzwaintzigistem Jare.

Source Fulltext: Peter Peusquens