Ich Herman Herting und ich Alheit sein hausvrow vergehen allen den die disen brief lesen oder horen lesen die nu leben oder hernach chunftig sint. daz wir mit unserr Erben guten willen und Gunst mit verdachtem muet mit gesampter hant ze der zeit da wir ez wol getun mochten und mit hern Gerungez hant ze den zeiten perchmaister dez probstez von Newenburch Recht und redleich verchauft haben dem Erbern Manne Chunraden dem Wiltwe(r)cher Burger ze wienn und vrown Mergarten seiner hausvrowen und allen iren Erben unsern weingarten der da leit ze nest dem Gayzruch dez ein gantz Jeuch ist da von man dient aller jar in dem lesen drithalben Emmer weins ze perchrecht und drey wienner phenning ze voitrecht und nicht mer. Den selben weingarten hab wir im geben um zwaye hundert phunt wienner phenning der wir gantz und gar gewert sein. und sey auch wir mit sampt unsern Erben dez vorgenanten weingarten sein und seiner Erben rechter gewer und scherm fuer allen irsal und ansprach nach des landes recht in Osterreich und der stat gewonheit ze wienn. und vergich auch ich vorgenant Alhait besunder daz der Egenant weingart mein morgengabe nicht ist. und daz die red und der chauf furbaz stet und untzebrochen bleib. dez geb wir in disen brief versigelt mit unserm ingesigel und mit unsers vorgenanten perch-maister ingesigel und mit der Erbern herren ingesigel hern Weychartz von Winchel und mit hern Albrechtz von Rawenstayn die diser sache zeug sint mit sampt iren ingesigeln Diser brief ist geben ze wienn nach Christez burth dreutzehen hundert jar darnach in dem acht und dreyzigisten jar an sand Agnesen Tag.

Source Fulltext: Peter Peusquens