Ich Barbara die Ryederynn Vergich offenleich mit dem brief daz mich die erbern Mann Hanns der Zyrnast und Hanns der Mosprunner dietzeit ausrichter und volfurêr des gescheffts so Hanns der Arnstorffer dem Got genad, mein vetter getan hat, verrichtet und gewert habent, zway und dreyssig phunt wienner phenning die mir derselb mein vetter Hanns der Arnstorffer geschafft hat alls dasselb geschêfft vor dem Rat der Stat ze Wienn mit erber chuntschafft beweist ist und alls es ze einer ewigen gedêchtnuezz in dem Statpuch geschriben stet, Und sag auch ich fuer mich und fuer all mein Erben die vorgenanten geschêfftherren und all Ir Erben der egenanten zwayer und dreyssig phunt phenning gentzleich quidt ledig und los Mit urchund des briefs versigilten mit der zwayer erbern Mannen Ulreichs des Wolf und Paulen des Wagendrüssel, paid purger ze wienn aufgedrukchten Insigiln die ich des fleizzigleich gepeten han ze gezeugnuzz der sach In an scha-den Darunder ich mich verpind mit meinen trewn angever alles daz stet ze haben daz vor an dem brief geschriben stet Der geben ist ze Wienn Nach Kristi gepuerd viertzehenhundert jar darnach in dem Sybenten jar des negsten Sampstags nach sand Petronellen tag.

Source Fulltext: Peter Peusquens