Ich Dorothee Dyetreichs des Urbêtschen hawsfraw Mertens Swester des Muensmaister ze Bruenn vergich offenleich mit dem brief allen den die in lesent oder horent lesen die nu lebent und hernach chuenftig sind daz ich mit guetem willen und mit wolpedachtem muet durch pesuender lieb zue der zeit do ich ez wol getuen mocht Rechtt und redleich gemacht han und vermach auch wizzenleich mit dem brief egenannten meinem wiert dyetreichen dem urbetschen die Sechs hundert phund wyenner phenning die er im und mir nyder und angelegt hat zu Nyclasen dem Chletten auf drew jar da von er uns all jar dient Sechtzig phund wyenner phenning die mir der vorgenannt mein brueder Mertt der Muensmaister zu meinem vorgenanntten wiert geben hat und die mir von meinem vater seligen worden und an mich chomen und gevallen sind also peschaiden-leich Ist daz ich und der egenannt mein wiert mit einander chind gewynnen darauf suellen denn nach unser paider tod die egenanntten Sechs hundert phund phenning erben und gevallen Waer aber daz mich derselb mein wiert ueberlebet und daz ich im nicht chind hinder mein liezz die wir mit einander hieten Oder ob ich im chind hinder mein liezz und daz die auch alle abgyngen und stuerben ee denn er So sol er denn die egenanntten Sechs hundert phund phenning ledichleich haben und allen seinen fruemen damit schaffen Ist aber daz meinem wiert Dyetreichen dem Urbetschen sein not geschiecht und in guet duenkchet So mag er mit den egenanntten Sechs hundert phund phenning die ich im gemacht han ledichleich seinen fruemen schaffen wem er wil vor meim tod oder nach meim tod mit versetzen mit verchauffen und geben wem er well an allen iersail und gib ich im den brief zu einem waren urchund der sach versigelten mit der zwayer Erbern mann Insigel Niclas des Schermitzer die zeit des Rates der stat ze Wyenn und Chuenrates des Vorlauffs purger da selbs die ich des vleyzzleich gepeten han daz si der sach getzewg sind mit iren angehangen Insigelen in paiden an schaden dar under ich mich verpint mit meinen trewn an gever allez daz staet ze haben daz vor an dem brief geschriben stet der geben ist nach Christi gepuerd drewtzehenhundert jar dar nach in den sechs und newntzigiste jar des nagsten freitags nach sand Erharts tag.

Source Fulltext: Peter Peusquens