Wir Michel der Gewchramer, in den zeiten Purgermaister und Muenzmaister, und der Rat gemain der Stat ze Wienn vergehen offennleich mit dem brief, das fuer uns choemen ist in offenn Rat, Hanns der Spiegler, die zeit des durichleuchtigen hochgeborn fuersten, Hertzog Albrechts ze Oesterreich etc. unsers genedigen herren Chelerschreiber, und hat da vor unser, beweist, zu rechter zeit, als er ze recht solt mit den zwayn erbern mannen Chuenraten, dem Stachler, zu den zeiten desselben unsers genedigen herren Hertzog Albrechts Chuchenmaister, und Jacoben von Weytra, das Geschefft, so sein hawsfraw, fraw Agnes, der Got genade, Stepans Tochter, auz dem Schreynhaws, an iren lesten zeiten getan hat, als hernach an dem brief geschriben stet, Also, das Si vonerst geschafft hat dem egenanten irem wirt, Hannsen dem Spiegler, die Erbgueter die her-nach benant sind Vonersten aynen weingarten gelegen an dem Myesenchogel, des fuenf achtail sind, zenechst des Dorns weingarten, darnach aynen weingarten, auch gelegen daselbens, an dem Myesenchogel, des ein viertail ist. Ayn halbes jeuch weingartens, gelegen an dem Wolfsgersperg, ayn halbes jeuch weingarten, gelegen an dem Rosenperg, und ayn haws Stadel und Pawmgarten, gelegen vor Stubentor ze Wienn, ledichleich allen seinen frumen damit zeschaffen wie jm daz allerpesst wol choem und fueg vor aller irrung Als umb daz vorgenant Geschefft, die obgenanten erbern Leut mit iren trewen in ayde stat, vor unser in offem Rat habent gesagt, als Si ze recht solten, und wannd daz Geschefft also vor unser in offem Rat beweist und pracht ist Darueber so geben wir dem egenanten Hannsen dem Spiegler, den brief zu einem warn offenn uerchuende, der sach versigelten mit der obgenanten Stat ze Wienn chlaynem anhanngundem Insigel. Der brief ist geben ze Wienn Nach Christes gepuerde drewtzehenhundert jar darnach in dem Newnzigistem jar, an dem achten Tage nach sand Niclas Tage.

Source Fulltext: Peter Peusquens