Ich Ulreich der Ekprecht, zue den zeitten oebrister Spitalmaister der purger spital vor Chêrnêr-tor ze Wienn vergich fuer mich und fuer all mein Nachchomen und tun kunt offenleich mit dem brif, daz ich van des gepotes wegen So der Edel und hachgeparn fuerst Hertzog Ruedolf sâliger van Osterreich in der Stat und varsteten ze Wienn umb grundrechtz und purchrechtz ablosung gepoten auf gesatzt hat Recht und redleich abzeloesen gegeben hab dem erbern mann Jansen dem wachsgiezzêr purger ze Wienn und seinen erben die zwai phunt wienner phenning geltes purchrechtes die das vorgenant spital gehabt hat auf irem haus vaderm und hinderm gelegen an dem hohenmarkcht ze Wienn zenêchst Jacobs haews des Guertler und stoezzet mit dem hindern tail gegen dem haus ueber genant die lantzchram umb sechtzehen phunt wienner phenning der ich gantz und gar verricht und gewert pin und die demselben Spital ze nutz wider angelegt sind an ander zwai phunt geltz purchrechtz auf Niclas haus des Pippings gelegen inder Viltzerstrazz ze Wienn Also mit ausgenomen worten daz ich noch mein nachchoemen noch anders niemen van unsern noch des egenanten Spitals wegen umb die vorgenanten zwai phunt geltz purchrechtz auf das obgenant haeus an dem hohenmarkcht fuerbas nimmer mer dhain ansprach noch vadrung haben noch gewinnen suellen weder vil noch wenig. Waer aber ob fuerbas icht brief oder urchuend fuerpracht wurden van wem das wêr die umb die egenanten zwai phunt geltz auf dasselb haus sagten die selben brief und urchund alz verr si dasselb purchrecht beruerend, suellen denn gaentzleich allerding tod und zenichte sein und chain chraft mer haben weder chlain noch groz Und dar ueber zue einem warn urchuend gib ich fuer mich und fuer all mein nach-choemen in den brief versigelten mit des vargenanten Spitals ze Wienn anhangundem Insigel Der brief ist geben ze Wienn nach Christes gepuerd, drewtzehenhundert jar dar nach in dem acht und achtzigistem jar dez Manta(g)s nach Gottes Auffarttag.

Source Fulltext: Peter Peusquens