Wir abbt Vlreich zue Wilhering und der gancz convent daselbs bekennen fur uns und fur all unser nachkomen/ und thün künd offenleich mit dem brief allen, die den sehent, hörent oder lesent, das unser hold, genant der Gerung uns/ ayns kaüfrechts auf unserem gut genant zu Ekch in sand Mareyn kirichen pharr und Edlinger gericht gelegen, so er von unseren/ vorvadern säligen darumben brief und sigel gehabt hat, uns mit frumen lawtten webeyst hat, das im die verloren warden/ sein dasselb kaufrecht auf dem egenantten unserem guet ze Ekch aller seiner zuegehorung das verleichen, verlassen und bestetten/ das dem benantten Gerung und allen seinen eriben wissentleich mit dem brief in solicher beschaiden, das er und all sein eriben/ oder wer das guet von uns ze lehen hat nun furbaser all jar jerleichen dovon raichen und diennen sullen den gewandleichen dienst/ nach unsers urbar puech laütt und sag und sullen darzue unser gehorsam und gewertig holden sein, unseren diennst zu rechter/ diensstzeyt ausrichten an alles vercziechen, unser stifttayding besuechen, stewr dulden und leyden nach genaden als ander/ unser holden; wann uns der lanndtfürst bestewrt und der nicht wider sein sunder umb all sach vor uns zu recht sten und/ kayn hern noch scherm fur uns nehmen, anders sy hietten alle iere recht verloren und in unser gewalt gevallen ledikchleichen/ an als widersprechen wie stet auch das guet verwandlt von aynem auf den anderen, es sey mit tod, abfart oder anlaytt, wie/ sich das fueget von ysleichem besunder der gibt uns [sechzikch] phennig; ob sy auch irn rechten muesten oder weldten ver-/ kauffen oder verseczen, so sullen sy uns von erst annotten das abzelosen; welten wir den das nicht losen so mugen sy dan/ iren recht wol verkauffen unengoldten unser rechten und vadrungen und auch irem gelech und genossen der uns und unserem/ guet fuegleich und nuczleich sey und alles beschech mit unser hanndt, insigel, willen und wissen, anders es hiet kchayn/ kraft angever; wir sein auch des benantten kaufrecht auf dem egenanten unserem guet, seiner zuegehorung ier rechter herre,/ gewer, schermb und furstand an aller stat, wo in des zu recht nott beschiecht als dann kaufrechts lanndes in Osterreich/ ob der enns recht ist, das inn das war und stett beleib des geben wir benantt abbt Vlreich zu Wilhering in des den/ brief besiglten mit unserm und unsers convents payder anhangunden insigel, der geben ist nach der purd kristi im/ vierczehenhundertisten und nawnn und dreissigisten jaren an freytag nach Eufenie der heiligen junkchfrawn.