Ich Chunrat der Dürsperger, dy zeit zechmaister ze Greymhartsteten vergich und tun chund offenleich/ mit dem brief allen den, dy in ansehent, hörent oder lesent, das ich nach rat der pfarrlaẅt/ ain freys chaufrecht tze chawffen geben hab auf des gotzhaẅs güt genant am Zagel/ in der Ryedmarich Steffan dem Zagler und iren payden eriben umb ain gelt, des wir gancz/ und gar von in gericht und beczalt sein warden ze rechten tägen an allen schaden, also in der/ peschayden, das sy dem gotzhaẅs alle jar järleich davon dienen und raichen schullen zum/ unserer frawn tag zü der dienst zeit funf schilling wyenner pfennig und nicht mer und/ schullen auch gehörsam sein, als ander des gotzhaẅs pehaẅst holden, und wer abfert,/ der geit dem gotzhaẅs zwey pfennig und wer auffert auch als vil, und schol auch das/ güt paẅleich und stiftleich halten. Ich pin auch vorgenanter zechmaister des selben/ gotzhaus ir rechter herr und gwer an aller stat, wo in des nöt und dürft geschyecht./ als söleichs chaufrechtz recht ist indem lant ob der Enns mit urkunt des priefs be-/ sigelt und wolbestätt mit der edlen vesten Syman des Äschpens und Frydreichs des/ Rüdleinstorffer, payder anhangunden insigel durich unser vleizzigen pet willen,/ in und iren eriben anschaden. Der prief ist geben nach christy gepürd vierzehen/ hundert jar und darnach in dem newnzehenten jar am freytag vor dem heyligen/ auffart tag.