Ich Hanns Lueger, purger ze Everding, mein hawsfraw und all unser payder eriben gegenburtig oder kunftig, wir vergehen offenleich/ mit dem brif allen den, di in sehent, hornt oder lesent, das wir mit wolbedachtem mut, mit gunst willen und wart aller unser nagsten/ und pesten frewndt und eriben zu der zeit, do wir es mit recht wol getun machten, recht und redleich verchawft und ze chawffen/ geben haben dem beschaiden Hainreichen dem Mulchnecht, seiner eleichen hawsfrawn und ir paider eriben unser praytten akchers, di da/ gelegen ist in dem Spiegelveld czwischen Thomleins im Pawngarten und Andres im Tal, der payder lennter in Everdinger pharr/ in dem gericht im Aschachwinkchl umb ain gelt, des wir von in zu rechten tegen an allen schaden gantz und gar awsgericht/ und betzalt sein warden; wir antwurtten in auch di var genant praitten, als si mit marichen umbfangen ist aws unser nutz und/ gewer in ir nutz und gewer mit allen ern, rechten, nutzen, die durich recht darzu gehornt und davon bechomen mugen, wan/ man jerleichen von der benanten praytten dint und raycht zu der chappeln gen Schawnberg zu unser frawn tag der liechtmesse/ anderthalb phunt unslid zu rechtem schermrecht und nicht mer; wir haben in auch den chawff bestett und richtig gemacht/ mit aller stet, der si durch recht darzu bedorften; si mugen auch allen irn frum damit schaffen, mit versetzen, verchawffen, schaffen machen,/ geben, wem si wellent oder wie si des verlust; wir sein auch des chawfs ir recht gewern und furstant fur all rechtleich ansprach,/ wo oder wan in des mit dem rechten not und durft geschicht als chawfs und lanndes ob der Enns recht ist; ging in aber an dem/ chawff und gewerschaft icht ab, des si scheden nemen, wie der schad genant wer den ir aus pey sein trewn an ayd unberecht/ gesprechen mochten, den selben schaden allen schullen und wellen wir in gantz und gar ablegen und widercheren, das schullen si haben/ und bechomen, datz uns, unsern trewn darzu auf aller unser hab und gut, so wir haben, gewinnen oder lassen wo di gelegen oder/ wie di genant ist auf wazzer, auf lanndt, besucht und unbesucht, nichts awsgenomen wo si daran choment, mugen sew sich mit/ recht oder an recht, wie si des verlust als vil und lang underwinden, innhaben, nuczen und nyessen, als lang untz si irr scheden bekomen/ und irer gewerschaft wider gewaltig werden, das ist dan unser gutleich will und wart, und schullen auch dawider nicht sein/ noch tun weder wir noch ander nymand von unsern wegen in chainerlay weys angever, und des zu urchund geben wir/ in den brif besigelten mit des ersamen geystleichen herren hern Wolfgangs die zeit chaplan ze Schawnberg anhangunden/ insigel und mit des beschaiden Petreins aws dem Hayhenpach, die zeit richtter in dem Aschachwinkchl anhangunden/ insigel, di sew durch unser fleissigen gepet willen zu tzewgnuzz an den brif gehangen habent, in und irn eriben anschaden;/ darunder ich mich obgenantter Hanns Lueger, mein hawsfraw und all unser eriben verpinten mit unsern trewn an aydes stat,/ als das stet ze haben, das an dem brif mit warten geschriben stet. Geben nach christi gepurd virtzehenhundert und/ in dem funftzehenden jar an unser lieben frawn tag, als si geparn ist.