Ich Ott Abaltinger, mein hawsfraw und all mein eriben, unverschaydnleich, wir veriehen und tuen chund an dem/ offen brieff allen den, dy in sehent, horent oder lesent, das wir mit gutem willen und wolbedachtem muet, auch/ mit rat unser pesten freunt zu der zeyt und weyl, do wir ez recht und redleich getun mochten, verchaufft/ und ze chauffen gegeben haben den erwirdigen geystlichen herren abbt Jacoben und [dem] convent des gotzh-/ aws ze Wilhering unser gu/et und ackcher gelegen ze Renthartstorff in Harrchircher pharr, das so/ alles unser rittermesszigs freys aygen gewesen ist mit allen ern, rechten und […] und dar zue geho/ert/ zu holcz, ze veld, versu/ocht und unversu/ocht, wie so das genant ist, also wir es ynn gehabt haben und von/ alter her ist chomen umb ayn gelt, des wir gancz und gar gericht und ge[wert] sein an all scheden./ Wir antwurtten ynn auch dy obgenanten aekcher mit all irn zu gehorung auzz unser nuczz und gwer/ ynn ir nüczz und gwer, und tu[…]ein auch verzeyung hin für, das wir […] chayn anspruch/ schullen nach mugen gehaben weder mit recht noch anrecht, also das sy allen [irn frumen] damit mugen/ geschaffen, mit verseczen u[nd verkau]ffen, geben, tuen, wie se ymmer verlust. Wir sein auch ir recht fürstand/ und gwer an aller der stat und not und du/erfft geschicht und also recht indem landt ob der Enns ist./ Wer aver, das yn, irm gotzhaws an der gwerschafft icht abgieng, wie(stan) schaden sy des nemen/ den der herren ainer von Wilhering oder ir anwalt gesprechen möchten an ayd ungeswarn und/ ungerecht, den selben schaden [schullen] wir yn ablegen gantz und gar und widerchern und schullen/ auch haben, dacz uns und unsern trewn und darzu auff aller unser hab, wo wir dew indert/ haben oder lazzen auff wazzer und auff landt, versucht und unversucht, in welcher herschaft oder gericht/ dy gelegen ist, der mugen sy sich wol underwinden mit unserem gutleichem willen und wart und/ schullen auch des unengelten s[…]en uns und allen richtern und wez wir mit (ym) darumb an er-/ hueben mit recht oder an recht, das habent se alles behabt und gewunen und […] verlorn, das dy red stet und unczeprochen beleib, daruber gib ich obgenanter Otto Abaltinger, mein hawsfraw/ den brieff besygilten und [bestteten] mit meinem anhangunden insigil [darzu zu ainer pesser]/ sycherhayt und zeugnuzz mit des erbern Mertten des Angrer di zeyt phleger auff Stauff-/ leyten anhangunden insigil, [den] ich darumb fleyzzigchlich gepeten [han], [im und seinen erben an]/ schaden. Der brieff ist [geben nach] [chri]sti gepurd virzechen hundert iar [darnach in dem zweyten]/ iar an der heyligen [dreyer kunig tag].