Ich Eysenreich der Fleizhacher purger zu Ottenshaim vnd mein hausfraw Chunigunt vnd alle vnser erben wir veriechen -, das wir haben versetzt vnser peunt halbew datz Nidern-Ottenshaim - fu^er drew pfunt pfenning alter wyenner münse dem erbern man Hnr. (Heinrich) dem Polsentzer vnd seiner hausfraw vnd allen seinen erben, vnd schol auch losung sein alle jar ja^erleich an sand Gorgen tag, vnd das ist beschehen mit herrn Matheus des Guster willen vnd wort von Wilhering. Vnd wer das dem vorgenanten Hainreichen der pfennig not geschach, so hat er vollen gewalt anderswo zu versetzen vnd verchauffen wem er will mit vnserm gutleichen willen - -. Darvber gehen wir in den brieff offen versigelt mit des erbern mans Stephans des Holtzmans anhangunden insigel, zu den zeiten purkgraf vnd richter datz Ottenshaim - -. Der brief ist geben - dreuczehen hundert jar darnach in dem sechczkisten jar an des heiligen chraucztag.

Source Fulltext: OÖUB 7 (Wien 1876) S. 698, Nr. 693