Wir Seyfrid, Friderich, Chunrat vnd Otto We\alchlinger thun khundt allen den, di disen brief sehen vnd ho^ern lesen, das wir mit verainttem vnd verdachtem Muet vnd mit vnsern vnd mit vnsrer Swestern gutten willen Hedewich vnd Perichten nach vnnsrer freundt Rat haben lassen vnnd sein gestannden gannczlich vor vnnsern herren Eberharten vnd herren Hainrichen von Walsse von dem krieg, den wir haben gehabt wider den Erbern Abbt Chunraten vnd sein Closter ze Wilhering vmb das Lehen zu Alharting, Auf das wir Erbrechts ja^ehen vnd haben auch dem vorgenannten Abbt vnd seinem Closter ze Wilhering auf geben mit rechter fu^ertzicht Alle die ansprach vnd daz recht, daz wir hetten vnd haben sollten oder ze haben jahen an dem vorgenannten lehen zu Alhartting zu der zeit, vnd wir es woll mo^echten getun Also, das wir vnd die vorgenannten vnnser Swester vnd alle vnnser Erben furbas nymer mer dhain recht oder ansprach haben sullen noch haben mugen oder jehen auf das vorgenannt lehen zw Alharting vnd globen auch das fur vnns, vnnser Swester, die vorbenannt sindt, vnd fur alle vnnser Erben, vnd das dem vorgenannten Abbt vnd seinem Closter ze wilhering ditz gelub vnd dyse fürzicht, die wir haben gethan an dem vorgenannten lehen, stätt, vnuerkhert vnnd Ewig beleybe, So geb wir jn ze vrkhundt dysen brief versigelt nach vnnser Beth mit vnnser herren jnnsigel herren Eberharts von Walsse des lanndtrichter ob der Enns vnd seins Brueders herren Hainrichs von Walsse, Wann wir selbert nicht jnnsigels haben, ditz sind gezeug her Ortolff von Khersperg, her Rudolff von Alharting, her Wernhart Gnewss, Her Hainrich von Wuldenstorf, Ortolff von Alhartting, Rudolff von Awe, Hainrich vron Tuten Sun ze lynntz, Hainrich Tungassinger, lewpolt sein veter vnd annder pider lewtt gnueg. Ditz ist geschehen Nach Cristj geburt jn dem Dreylzehennhundertisten jar ze sannd Georin misse.

Source Fulltext: OÖUB 4 (Wien 1867) S. 339-340, Nr. 365