Bonifacius episcopus, seruus seruorum dei Dilecto filio... Preposito Monasterij in Sanctoypolito per Prepositum soliti gubernari, Patauiensis diocesis, Salutem et apostolicam benedictionem. Sua nobis dilecti filij Laurentius Abbas et Conuensus Monasterij in Sittensteten, ordinis sancti Benedicti, Patauiensis diocesis peticione monstrarunt, quod orta dudum inter ipsos Abbatem et Conuentum ex vna, et Petrum de Pharkirchen presbiterum parte ex altera, de et super parrochiali ecclesia sancti viti in Wolfspach dicte diocesis materia questionis, tandem partes ipse in Symonem Rectorem parrochialis ecclesie Inderauwe, Thomam de Walthusen, vlricum de pfarkirchen presbiteros dicte diocesis tanquam in arbitros arbitratores et amicabiles compositores concorditer super hoc sub certa pena compromittere curauerunt, qui equum inter eos arbitrium promulgarunt, quod utraque pars illud duxerit acceptandum, dictus tamen Petrus postmodum in contrarium uoluntate mutata, arbitrium ipsum obseruare indebite contradicit. Quodcirca discretioni tue per apostolica scripta mandamus, quatinus si est ita, dictum Petrum ad obseruationem ipsius arbitrij sicut est equum, et ab ipsis partibus acceptatum monitione premissa, per penam in compromisso expressam appellatione remota preuia ratione compellas. Datum Rome apud sanctum petrum, Non. Junij Pontificatus nostri Anno octauo.

Source Fulltext: RAAB, Seitenstetten (=FRA II/33, Wien 1870) S. 361