Ich katrey weilnt Haugeins von Pirboem hausvraw, vnd wir fridreich. lienhart vnd Jans ir sun, vnd wir Margret vnd Chunigund, Anna und Elsbet ir tochter. vnd mit vns all vnser erben, wie die genant sind, vergehen offenbar mit dem gegnwurtign brief vm den hof cze Pirbaem, in Wolfspekcher pfarr gelegn, auf dem der vorgenant haug, dem Got gnad, ist gesezzen, den wir von dem Gotshaus vnd von dem erwirdigen Abbt cze seydnstetn, vnserm gnaedigen herrn czu eribrecht gehabt habn, Daz wir mit wolbedachtem mut vnd mit gutem willn, nach vnserr pessten vrewnt rat, cze der czeit, da wir ez wol getun machtn, den genantn hof ze Pirbaem habn redlich cze chauffn gegebn obgenanten Gotshaus, vnd vnserm gnaedign, erwirdign herrn, hern Engelschalichen cze der czeit Abbt, vnd pfleger cze seydnstetn, vnd allen seinen nachchomen, mit allen den rechtn vnd nuczzn, die durch recht von alter dar czu gehornt, cze veld vnd cze holcz, gestift vnd vngestift, besuecht vnd vnbesuecht, wie die genant sind, als vil wir dar an recht gehabt habn, vmb sechs und czwainczik pfunt wienner pfenning, vnd vm ainn mutt chorn, vnd ain mutt habern, vnd dar czu vm sechczik wienner pfenning, di vns cze furczicht sind gesprachn wardn, des wir alles gancz vnd gar gericht vnd gwert sein, jn der beschaidenhait, daz wir vnd all vnser erbn vnd auch nachchomen nimer mer dhain ansprach, oder recht dar czu habn oder gewinnen sulln, weder wenich nach vil. vnd seu sulln den obgenanten hof cze Pirbaem bestiften vnd dar auf seczzn, wer in dar czu geuelt, mit vnserm vnd aller vnserr eribn vnd vrewnt gutlichm willn, also daz wir seu dar an sulln weder mit wortn, nach mit werchn ninndert irren. Vnd daz des daz offt genant Gotshaus cze Seydnstetn furbaz von vns vnd von alln vnsern erbn vnd vrewntn vnentgoltn vnd an schadn beleibe, daz verhaizz wir alle, di vor geschribn stent, mit vnsern trewn, an aydes stat. Geschaech awer, daz vnser dhains daz vberfur. vnd praech, vnd gestund dem ee genantn Gotshaus cze Seydnstetn dhain schad oder mue da von auf, den sulln wir im allen auzrichtn vnd widerchern, vnd den sol ez habn auf vns vnd auf all vnser hab, di wir habn oder nach gewinnen mugn. Vnd swelichz vnder vns daz praech, swo daz daz selb gotshaus cze Seydnstetn oder sein pfleger anchommet. in stetn. in maerchten. vnd in dorffern, auf wazzer der auf land, da sol ez dem selbn Gotshaus cze Seydnstetn mit leib vnd mit gut veruallen sein, an chlag vnd an allez recht. Daz di red also von vns allen staet vnd vnczebrochen behaltn werd, dar vber gebn wir den offenn brief czu einem sichtigen vrchund, vnd czu einer gutn geczeugnuss. wann wir aygner jnsigl nicht enhabn, versigilten mit des erbern Ritter hern Chunrats von Aura, vnd mit der erbern Dytreichs des Czauhinger. cze der czeit Richter cze seydnstetn vnd fridreichs des Waczzn von Chrenstetn, anhangunden jnsigiln, in an schadn, die der sache damit geczeug sind wardn, durch vnsers vleizzigen pets willn, hinder die wir vns auch verpunden haben allez daz staet cze habn, daz oben geschribn ist. Der red sind auch geczeugn Chunrad der smid, vnd Nycla, mein vorgenanter kathreyn bruder, vnd Chunrat neythart von Aschpach, mein vrewnt, di der obgeschribn handlung sind taidinger gewesn, vnd anderr erberr laeut genug. Der brief ist gegebn nach Christi gepurde vber dreuczehen hundert jar. dar nach in dem sechs vnd sechczgistn jar, an sand Achacij Tag.

Source Fulltext: RAAB, Seitenstetten (=FRA II/33, Wien 1870) S. 247-248